Հայաստանի հանքարդյունաբերության և մետալուրգիայի ասոցիացիան PDAC 2026-ում ներկայացրել է Հայաստանի հանքարդյունաբերության ոլորտի ներուժն ու համագործակցության հնարավորությունները

Մարտի 1–4-ը Կանադայի Տորոնտո քաղաքում կայացած PDAC 2026 միջազգային համաժողովին մասնակցել է Հայաստանի պատվիրակությունը, որը գլխավորել է ՏԿԵՆ փոխնախարար Ասատուր Վարդանյանը։

Պատվիրակության կազմում ընդգրկված էին նաև Հայաստանի հանքարդյունաբերության և մետալուրգիայի ասոցիացիայի նախագահ Վարդան Ջհանյանը, Lydian Armenia ընկերության գործադիր տնօրեն Հայկ Ալոյանը, ՀՀ դեսպանության դիվանագետ Գոռ Եդիգարյանը։

Համաժողովի շրջանակում Վարդան Ջհանյանը մի շարք աշխատանքային հանդիպումներ է ունեցել տարբեր երկրների, Կանադայի նահանգների և միջազգային կազմակերպությունների ներկայացուցիչների հետ։ Մասնավորապես, հանդիպումներ են տեղի ունեցել Ֆինլանդիայի, Քվեբեկի և Շվեդիայի ներկայացուցիչների, ինչպես նաև միջազգային խոշոր հանքարդյունաբերական ընկերությունների՝ BHP և Newmont ղեկավարների հետ։

Քննարկումների ընթացքում անդրադարձ է կատարվել նշված երկրների հանքարդյունաբերության ոլորտում կուտակված փորձին, ոլորտի արդյունավետ կառավարման և զարգացման մոդելներին, ինչպես նաև դրանց հնարավոր կիրառելիությանը Հայաստանում։ Կողմերը քննարկել են նաև Հայաստանի հանքարդյունաբերության ոլորտում ներդրումային հնարավորությունները և միջազգային ընկերությունների հնարավոր հետաքրքրվածությունը հայկական շուկայում։

Prospectors & Developers Association of Canada-ի կողմից կազմակերպվող համաժողովը համարվում է աշխարհում հանքարդյունաբերության և օգտակար հանածոների հետախուզման ոլորտի ամենախոշոր և հեղինակավոր միջոցառումներից մեկը։

Այս տարի PDAC 2026 ֆորումում գրանցվել է 32,155 մասնակից, ինչը համաժողովի պատմության մեջ ամենաբարձր մասնակցությունն է, ինչպես նաև ցուցահանդեսին ներկայացել է ավելի քան 1300 ցուցադրող կազմակերպություն, ինչը նույնպես ռեկորդային ցուցանիշ է։