Փաշինյանը մեկուսացել է ՔՊ-ում

«Քաղաքացիական պայմանագիր» կուսակցությունում ստեղծված մթնոլորտը, մեղմ ասած, «լարված» կարելի է բնորոշել։ Մինչ Փաշինյանն ու իր թիմակիցները փորձում են իրենց ուրախ ավտոբուսով և նախընտրական քարոզչությամբ տպավորություն ստեղծել, թե իշխանության մոտ գործերը բավական լավ են ընթանում, ՔՊ մեր աղբյուրների փոխանցմամբ, իրավիճակն ամենևին էլ հանդարտ չէ։ Ու դա է վկայում հենց նույն այդ ավտոբուսում ստեղծված իրավիճակը։

Մեր աղբյուրի փոխանցմամբ, ուղիղ եթերներն ու տարածված բեմադրված տեսանյութերը չհաշված, Փաշինյանը այդ ավտոբուսում իրեն չափազանց մեկուսացված է պահում, շատ քչերի հետ է շփվում, և հիմնականում նստում է ոչ թե ավտոբուսի սկզբնամասում՝ Ալեն Սիմոնյանի հետ, այլ վերջում, Վիլեն Գաբրիելյանի, Սերգեյ Բագրատյանի և այլոց հետ, ընդ որում հիմնական ժամանակն անցկացնում է հեռախոսի մեջ, և կուսակիցների հետ առանձնապես չի էլ շփվում։

Ըստ քպականների, Փաշինյանի այս տրամադրության անկումը սկսվել է Աննա Հակոբյանի հետ ամուսնալուծությունից հետո, իսկ այդ ամուսնալուծությունը հետևանքներ է ունեցել ոչ միայն Փաշինյանի համար, այլ կուսակցության ներսում։

Շատերը չեն կարողանում հստակ հասկանալ իրենց հետագա ճակատագիրը։ Բանն այն է, որ «Քաղպայմանագրում» բազմաթիվ պաշտոնյաների ու պատգամավորների թիկունքում հենց Աննա Հակոբյանն է կանգնած եղել։ Եվ այժմ վերջիններս չգիտեն, թե իրենց ինչ ապագա է իրականում սպասվում, նույնիսկ եթե բավական բարձր տեղեր են զբաղեցրել ՔՊ նախընտրական ցուցակում։

Ստեղծված իրավիճակը տարածվում է նաև քպական շարքերի վրա, որոշ կառույցներ ամբողջական կազմերով դուրս են եկել «Քաղաքացիական պայմանագրից», հատկապես ընտրական ցուցակի ընտրություններից հետո, երբ տեղական որոշ ազդեցիկ դեմքեր հանգրվանել են ընտրացուցակի ոչ անցողիկ տեղերում։ ՔՊ-ում նաև լուրջ վախ կա ընդդիմությունից, և այժմ շատերը փորձելու են կամուրջներ ստեղծել ընդդիմադիր ուժերի հետ, փորձելով իրենց ծառայությունները առաջարկել նրանց՝ իշխանափոխությունից հետո սեփական անվտանգությունը ապահովագրելու համար։

Ինգա Հովսեփյան