Իսրայելի կողմից Բեյրութի հայաբնակ թաղամասի հարակից շրջանին հասցված հարվածից հայեր չեն տուժել
Իսրայելը հարված է հասցրել Բեյրութի հյուսիսային ծայրամասում գտնվող Նաբաա շրջանի շենքերից մեկին, ինչի հետևանքով բնակարաններից մեկում հրդեհ է բռնկվել։ Նաբաա շրջանը գտնվում է Բուրջ Համուդ թաղամասի անմիջական հարևանությամբ, որի բնակչության մեծամասնությունը հայեր են։
«Արմենպրես»-ի հետ զրույցում Բեյրութի հայկական «Ազդակ» թերթի գլխավոր խմբագիր Շահան Գանտահարյանը տեղեկություններ փոխանցեց այդ կապակցությամբ՝ նշելով, որ վերջին օրերի ռազմական գործողությունների ընթացքում, ինչպես նաև «Հըզբոլլահ»-ի ու Իսրայելի միջև 2024 թվականի հակամարտությունից ի վեր առաջին անգամ հրթիռակոծվել է Բեյրութի հայկական թաղամասի հարևանությամբ գտնվող բնակելի թաղամասը։«Բարեբախտաբար, լիբանանահայերի շրջանում զոհեր և վիրավորներ չկան, սակայն մեզ շատ է մտահոգում այն իրողությունը, որ թիրախավորվել է Բուրջ Համուդի հարակից տարածքը։
Հրթիռակոծումը բավականին մոտ է եղել մեր թաղամասին։ Հարվածից տուժած բնակարանում նույնպես հայեր չեն եղել։ Շրջանառվող տեղեկատվության համաձայն՝ իսրայելական կողմը թիրախավորել է այն բնակարանը, որտեղ բնակվում էր «Հըզբոլլահ»-ի անդամներից մեկը, ով հատուկ նշանակություն ուներ Իսրայելի համար»,- ասաց Գանտահարյանը։ Նա վստահեցրեց, որ խուճապային տրամադրություններ չկան, սակայն կա անորոշություն, ինչն էլ մեծ անհանգստություն է պատճառում բնակիչներին։
«Լիբանանի կառավարությունը պաշտոնապես հայտարարել է, որ պատրաստ է ուղիղ բանակցություններ վարել իսրայելական կողմի հետ և նույնիսկ ցանկանում է պատվիրակություն ձևավորել, որպեսզի հանդիպեն Կիպրոսում, սակայն այդ հարցում էլ դեռ հստակություն չկա։
Փոխարենը՝ սաստկացել են հրթիռակոծումները։ Իսրայելը նպատակ է դրել անվտանգության գոտի ստեղծել Լիբանանի հետ սահմանի երկայնքով, և նույնիսկ նախատեսվում է այդ ծրագիրն իրականացնել Լիբանանի տարածք ներխուժելու միջոցով։ Շատ բարդ իրավիճակ է, և հանգուցալուծման որևէ նախադրյալ դեռ չի նշմարվում»,- հայտնեց Գանտահարյանը։
Փետրվարի 28-ին ԱՄՆ-ի և Իսրայելի կողմից Իրանի դեմ ռազմական գործողությունների մեկնարկից հետո լիբանանյան «Հեզբոլլահ» շարժումը սկսել է հարվածներ հասցնել Իսրայելին՝ հաջակցություն Իրանի։ Իսրայելն էլ պատասխան ռազմական գործողություններ է սկսել «Հեզբոլլահ»-ի դեմ՝ թիրախավորելով Բեյրութը և Լիբանանի հարավային շրջանները։ Հարվածների զոհ է դարձել գրեթե 690 մարդ։
«Հայկական ավիաուղիները» Երևան է տեղափոխել իր առաջին Boeing 737-800 տիպի ինքնաթիռը. «Հետք»
ՌԴ ԱԳՆ-ն «The Insider»-ի «ռուս գործակալների Երևանում գտնվելու» մասին լուրն անվանել է կեղծ
ՔՊ-ականներն ահաբեկում են անգամ անչափահասներին. «Հրապարակ»
ՔՊ՝ 28,8 %, «Ուժեղ Հայաստան»՝ 14,9%, «Հայաստան»՝ 12,1%, ԲՀԿ՝ 8,7 %, «Միասնության թևեր»` 5,8 %․ սոցհա...
«Նախընտրական Հայաստանը թուրք-ադրբեջանական ծրագրերում» թեմայով փորձագիտական քննարկում տեղի կունենա
«Հրապարակ». Հավաքին մասնակցելու համար ազատել են պաշտոնից
Միջնորդություն է ներկայացվել ԿԸՀ՝ Թևանյանի նկատմամբ հետապնդում հարուցելու համաձայնություն ստանալու
Մյասնիկյան պողոտայում բախվել են 2 «BMW» և «Hyundai Elantra»-ն. վերջինն էլ բախվել է ծառին. կա վիրավոր
Դիմակավորված անձինք ներխուժել են ԱԺ պատգամավոր Մարտուն Գրիգորյանի տուն
Ողբերգական ավտովթար՝ Սյունիքի մարզում. բախվել են 2 «Mercedes Sprinter»-ը. վարորդներից մեկը մահացել է