Ծննդկանի մահվան դեպքով նախաձեռնվել է քրեական վարույթ

Օրեր առաջ ծննդկանի մահվան դեպք է արձանագրվել։
24News-ին Առողջապահության նախարարությունից հայտնեցին, որ ծննդաբերության ընթացքում դիտվել է հղիի վիճակի կտրուկ վատթարացում` գիտակցության կորուստ:

24News-ի տեղեկություններով հղիի կրիտիկական վիճակը արձանագրվել է Հանրապետական հիվանդանոցում` ընդհուպ գիտակցութան կորուստ, այնուհետև շտապ տեղափոխել են «Սուրբ Գրիգոր Լուսավորիչ» ԲԿ, քանի որ այնտեղ առկա է 3-րդ մակարդի վերակենդանացման բաժանմունք։ Կեսարյան հատումն արվել է Հանրապետական ծննդատանը, այնուհետև տեղափոխել են «Սուրբ Գրիգոր Լուսավորիչ» ԲԿ, որտեղ արձանագրվել է կնոջ մահը։

«Բժշկական թիմի կողմից արվել են հնարավոր միջոցառումները, կատարվել է շտապ կեսարյան հատում: Բժշկական թիմի և առողջապահության նախարարության ջանքերով անմիջապես կազմակերպվել է ծննդկանի` 3-րդ մակարդակի վերակենդանացման բաժանմունք տեղափոխելը: Ցավոք, ծննդկանի կյանքը փրկել չի հաջողվել: Նշանակված է դատաբժշկական փորձաքննություն: Փոքրիկի առողջական վիճակն այս պահի դրությամբ կայուն ծանր է:
Ցավալի կորուստ է, վշտակցում ենք ընտանիքին և հարազատներին»,-նշեցին նախարարությունից:

Քննչական կոմիտեից ի պատասխան 24News-ի հարցման՝ նշեցին, որ 2026 թվականի մարտի 22-ին ստացված հաղորդման առթիվ նույն օրը նախաձեռնվել է քրեական վարույթ՝ Քրեական օրենսգրքի 187-րդ հոդվածի 2-րդ մասի հատկանիշներով (բուժաշխատողի կողմից մասնագիտական պարտականությունները չկատարելը կամ ոչ պատշաճ կատարելը, որն անզգուշությամբ առաջացրել է մարդու մահ):

Նշանակվել է դիակի դատաբժշկական փորձաքննություն:

Հասմիկ Սարգսյան