Քառօրյա պատերազմը մեզ համար պետք է մնա ոչ միայն հիշողություն, այլ նաև հստակ դաս․ Անանյան

«Միասնության թևեր» քաղաքական նախաձեռնության հիմնադիր անդամ Դավիթ Անանյանը ֆեյսբուքյան իր էջում գրում է․

«2016 թվականի ապրիլի 2-ի առավոտն ինձ համար սկսվեց զինվոր որդուս հեռախոսազանգից։ Կարճ, գրեթե չձևակերպված մի նախադասություն՝
«պապ ջան, դե մենք գնում ենք»։
Մի ժամ անց միայն հասկացա, թե ուր էին գնում։
Այդ մի նախադասության մեջ արդեն ամեն ինչ կար․ պարտք, լռություն, վճռականություն… և այն հասունությունը, որը գալիս է միայն այն պահին, երբ մարդը կանգնում է Հայրենիքի առջև իր ընտրության հետ։
Փառք ու պատիվ մեր որդիներին։ Առաջին հերթին՝ նրանց, ովքեր քառօրյա պատերազմի և 44-օրյայի ժամանակ Հայրենիքին նվիրեցին իրենց ամենաթանկը՝ կյանքը։
Քառօրյա պատերազմը մեզ համար պետք է մնա ոչ միայն հիշողություն, այլ նաև հստակ դաս։
Այն ցույց տվեց, որ անվտանգությունը հայտարարություններով չի կառուցվում,
իսկ խաղաղությունը ցանկություններով չի պահպանվում։ Պետությունը ուժեղ է այնքանով, որքանով պատրաստ է պաշտպանել ինքն իրեն՝ ոչ միայն զինվորի խիզախությամբ ու անձնվիրությամբ, այլ նաև համակարգի ամբողջականությամբ և արդյունավետությամբ։
Եռաբլուրը միայն սրբատեղի չէ։ Եռաբլուրը պահանջ է։ Պահանջ՝ մեզ ու մեր սերունդներին։ Պահանջ՝ ծառայել Հայրենիքին անմնացորդ, պահանջ՝ վեր դասել այն սեփական կյանքից, պահանջ՝ երբեք չթուլանալ և չմոռանալ, թե ինչ գին ունի խաղաղությունը։
Այսօր այդ պահանջը այլևս միայն հիշողության մասին չէ։ Այն վերաբերում է նրան, թե ինչպիսի պետություն ենք ուզում կառուցել, ինչ արժեքներով ենք առաջնորդվում և արդյոք ունե՞նք զոհերի գինը հզոր և կենսունակ պետության վերածելու կամք ու վճռականություն»,- գրել է նա։