Փաշինյանի սարսափն ու Ընտրական օրենսգրքի փոփոխությունը

Փաշինյանն ու իր թիմը պատրաստվում են գողանալ առաջիկա ընտրությունները։ «Ուժեղ Հայաստան» կուսակցությունը հայտնել է, թե Ազգային ժողովում նրանք փորձում են անցկացնել մի օրենք, որը կվերացնի Հայաստանում ազատ ու արդար ընտրությունների անցկացման հնարավորությունը։ ՔՊ-ն Ընտրական օրենսգրքի փոփոխություններ է նախաձեռնել, որով արգելում են կուսակցությունների, դաշինքների կողմից անձնանունների օգտագործումը։

Փաստացի՝ սա «Քաղպայմանագրի» պատասխանն է գործարար, բարերար Սամվել Կարապետյանին, որի գլխավորած ուժը հայտարարել է «Ուժեղ Հայաստան Սամվել Կարապետյանի հետ» դաշինքի ստեղծման մասին։ Ի դեպ, նույն այդ ՔՊ-ն երկու տարի առաջ էր ԸՕ-ից հեռացրել համապատասխան դրույթը, որով արգելվում էր, որ կուսակցությունների դաշինքները պարունակեն անձնանուններ։ «Իրազեկ քաղաքացիների միավորման» ղեկավար Դանիել Իոաննիսյանն էր օրերս հիշեցրել, որ նախքան 2025 թվականը ընտրական օրենսգիրքն արգելում էր նման հնարավորությունը, սակայն 2024 թվականի դեկտեմբերին ԿԸՀ-ի առաջարկությամբ, առանց քաղհասարակության հետ խորհրդակցելու, այդ արգելքը հանվել է։

«Ինձ ահագին զարմացնում է իշխանություններից որոշների ինքնավստահությունը, որոնք կարծում են, թե կարող են գաղտագողի փոխել ընտրական օրենսգիրքը, բայց հետո այդ փոփոխության պատճառով գլուխները պատով են տալիս»,- նշել էր Իոաննիսյանը։ Թե որն է պատճառը, որ կարճ ժամանակ առաջ հանել էին այդ դրույթը, այժմ էլ փորձում են վերականգնել, ՔՊ-ից չեն ասում, բայց հստակ է, որ նոր փոփոխությունն արվում է բացառապես ընդդեմ Սամվել Կարապետյանի։ Ու այս փաստն ամբողջությամբ բացահայտում է իշխող ուժի սարսափը ընդդիմադիր թիվ մեկ դաշինքից։

Աննա Մարգարյան