Տարօրինակ արտահանում Հայաստանից Ադրբեջան

Ադրբեջանական լրատվամիջոցները երեկ տարօրինակ մի լուր տարածեցին, թե Հայաստանից Ադրբեջան արտահանում է իրականացվել։ Տարօրինակ այս դեպքում արտահանված ապրանքի ծավալն ու արժեքն էր՝ 960 դոլար։ Հայաստանի պետական եկամուտների կոմիտեն շտապեց հայտարարել, թե Հայաստանից ոչինչ չի արտահանվել Ադրբեջան։

Ավելի ուշ արդեն Ադրբեջանից հստակեցրեցին, թե 960 դոլար արժողությամբ վարդերը փաստացի ներկրվել են Նիդեռլանդների Թագավորությունից, ներմուծման ժամանակ գործընկեր համարվող երկիրը համարվում է ապրանքի ծագման երկիրը։ Այդ իսկ պատճառով վարդերը վիճակագրության մեջ արտացոլվել են որպես Հայաստանից ներմուծված, հայտնել են ադրբեջանական ՊԵԿ-ից, բայց չեն բացահայտել, թե ով է եղել 960 դոլար արժողությամբ վարդերի ներկրողը։

Ըստ ամենայնի, այդ վարդերը Հայաստանի տարածք նույնիսկ չեն էլ մտել․ հայկական փաստաթղթերով վերաձևակերպվել են և մեկ այլ երկրի, օրինակ՝ Վրաստանի տարածքով, տեղափոխվել են Ադրբեջան։ Ու վերջին ամիսներին Հայաստանը մեծ քանակությամբ ապրանքներ է ներկրում Ադրբեջանից կամ Ադրբեջանի տարածքով։

Ըստ պաշտոնական տեղեկությունների՝ այս տարվա առաջին եռամսյակում Հայաստանն Ադրբեջանից շուրջ 5․8 միլիոն դոլարի ապրանք է ներկրել՝ հիմնականում վառելիք, հացահատիկ, ցորեն։ Հայկական կողմը պնդում է, թե Ադրբեջանը շահագրգռված է Հայաստանից որոշ ապրանքներ գնել, այդ թվում, օրինակ, ալյումինի փայլաթիթեղ, բայց մինչ այս պահը դեռևս որևէ նման գործողություն կամ գործարք չի իրականացվել։

Փոխարենը Հայաստանը բավականին մեծ քանակությամբ ապրանք է ներկրում Ադրբեջանի տարածքով կամ հենց բուն Ադրբեջանից՝ դա փորձելով ներկայացնել որպես Հայաստանի ինքնիշխանության դրսևորում։ Հայտնի չէ, թե երբ Ադրբեջանը Հայաստանից ինչ-որ բան կներկրի կամ ընդհանրապես կհրաժարվի ներկրել։ Փոխարենը՝ փաշինյանական իշխանությունը Ադրբեջանի տարածքով վառելիքի ներկրումը և ցորենի ներկրումը փորձում է ներկայացնել որպես իր խաղաղության հիմնական առհավատչյա, և սա է, որ լուրջ տարակուսանք է առաջացնում Հայաստանի իշխանությունների գործողությունների նկատմամբ։

Աննա Մարգարյան