Փաշինյանն ու թիմակիցները մրցում են, թե ով լավ կպաշտպանի Ադրբեջանի շահերը

Ադրբեջանցի վանդալները վնասել են օկուպացված Մարտունիի Սուրբ Ներսես Մեծ եկեղեցու գմբեթի խաչը, տեղեկությունը հաստատել է Արցախի մշակութային ժառանգության մշտադիտարկմամբ զբաղվող Հովիկ Ավանեսովը։ «Արցախի մշակութային ժառանգության մշտադիտարկում» ծրագրի շրջանակներում դեռևս 2025 թվականի հոկտեմբերի 30-ին ներկայացվել էր եկեղեցու պարբերական վնասումների, մասնավորապես՝ պատուհանների կոտրման և կառույցի վրա առկա կրակահերթերի հետքերի մասին։

Օրեր առաջ էլ հայտնի դարձավ, որ Ստեփանակերտի մայր տաճարն ու Սուրբ Հակոբ եկեղեցին այլևս չկան։ Բաքուն, ընդ որում, ոչ միայն չի հերքում, այլև հաստատում է Արցախի մայրաքաղաքի եկեղեցիների ոչնչացումը՝ դրանք «ապօրինի» կառույցներ անվանելով, նշելով, թե դրանց քանդումը չի կարող դիտարկվել որպես կրոնական կամ մշակութային ժառանգության ոչնչացում։ Կովկասի մահմեդականների վարչությունն էլ հայտարարել է, թե «ապօրինի կառուցված երկու շենքերի քանդումը որևէ կերպ չի կարող աղավաղվել որպես կրոնական կամ մշակութային ժառանգության ոչնչացում»։

Այսպիսով, այն բանից հետո, երբ Ադրբեջանը 2023 թվականին լիովին վերականգնեց պետական ինքնիշխանությունը իր տարածքների նկատմամբ, նա այս ողջ ժամանակահատվածում պահպանել է այդ «ապօրինի շինությունները, որոնք օկուպացիայի խորհրդանիշներ են, իրենց գոյություն ունեցող վիճակում»։ Հայաստանի իշխանությունները ոչ միայն մտադիր չեն աղմուկ բարձրացնել ադրբեջանական վանդալիզմի կապակցությամբ, այլև պարզապես վերածվել են Բաքվի փաստաբանների։ Նիկոլ Փաշինյանն օրերս հայտարարել էր, թե Հայաստանը միջազգային կառույցներին չի դիմի ադրբեջանցիների կողմից Ստեփանակերտի Մայր տաճարի ոչնչացման փաստով։ «Ես չեմ կարծում, թե մենք, մեր նախորդ փորձը հաշվի առնելով, դա կդարձնենք միջազգային քննարկումների առարկա պետական մակարդակով»,– ասել էր Փաշինյանը՝ կոչ անելով շրջահայաց լինել։

«Ամենաշրջահայացը», թերևս, տխրահռչակ Արսեն Թորոսյանն է, որի հայտարարությունները ցնցել են նույնիսկ Փաշինյանին լոյալ անձանց։ Թորոսյանը եթերում, Ադրբեջանի կողմից Ստեփանակերտի Մայր տաճարի ավերման մասին, մասնավորապես, հայտարարել էր. «Մենք հայտարարել ենք մի բան, որ մեր համար, մեր ժողովրդի համար Ղարաբաղյան շարժումը փակված է։ Ադրբեջանն իր ինքնիշխան տարածքում ինչ-որ բան է անում»։

Ահա այս որակն է այսօր իշխում Հայաստանում, և դրանից օր առաջ ազատվելը վաղուց վերածվել է գոյաբանական հարցի։

Մանե Կիրակոսյան