ԱԷՄԳ-ն ակնկալում է շուտով մուտք ստանալ Իրանի միջnւկային օբյեկտներ. Գրոսի

ԱԷՄԳ-ն ակնկալում է առաջիկա շաբաթների ընթացքում մուտք ստանալ իրանական միջուկային օբյեկտներ, ՌԻԱ Նովոստի-ին տված հարցազրույցում հայտարարել է ԱԷՄԳ-ի գլխավոր տնօրեն Ռաֆայել Գրոսին։

«Ես հուսով եմ, որ դա տեղի կունենա մի քանի շաբաթվա ընթացքում, ոչ շատ ուշ։ Մի մոռացեք, որ փոխըմբռնման այս հուշագրում, որը նրանք ստորագրել են, խոսվում է համաձայնության հասնելու համար 60 օրվա մասին՝ համապարփակ համաձայնության։ Իհարկե, այնտեղ խոսքը ոչ միայն միջուկային թեմայի մասին է», - ասել է նա՝ պատասխանելով համապատասխան հարցին։

Գործակալության զրուցակիցը հիշեցրել է, որ կողմերի փաստաթղթում շոշափվում են նաև Հորմուզի նեղուցով նավագնացության ազատությունը և տարածքային ամբողջականության հարցերը՝ կապված հրադադարի հետ։

«Այսինքն՝ այնտեղ առկա են մի շարք թեմաներ, և բոլորն էլ բավականին բարդ են։ Բայց նրանք իրենք են իրենց համար սահմանել այս երկու ամիսը։ Ընդ որում՝ ժամանակն անցնում է, այնպես որ մնացել է արդեն մի փոքր ավելի քիչ։ Ուստի ես հուսով եմ, որ եթե վերջնական համաձայնությունը ձեռք բերվի այդ ժամկետներում, ապա հնարավորություն կառաջանա սկսել իրական աշխատանքը, որը, իհարկե, կներառի մուտքը այդ օբյեկտներ», - պարզաբանել է Գրոսին։

Հիշեցնենք, որ Իրանը և ԱՄՆ-ն հունիսի 18-ի գիշերը հեռավար կարգով ստորագրել են հուշագիր, որը նախատեսում է փետրվարի 28-ին սկսված ռազմական հակամարտության ավարտը։ Հուշագիրը նաև սահմանում է ժամկետները, թե երբ ԱՄՆ-ն կվերացնի ծովային շրջափակումը, իսկ Իրանը կվերականգնի նավագնացությունը Հորմուզի նեղուցում։