Հաստատվեց Տավարաբուծության զարգացման ծրագիրը. 2 տոկոսով վարկեր, 25 մլրդ դրամի կաթ եւ միս 5 տարում

Կառավարությունն իր այսօրվա՝ մարտի 29-ի նիստում հաստատեց «ՀՀ-ում 2019-2024 թվականների տավարաբուծության զարգացման ծրագիրը»: Հարցը ներկայացրեց գյուղատնտեսության փոխնախարար Գեղամ Գեւորգյանը՝ նշելով, որ ծրագրի շրջանակում տոհմային եղջերավոր կենդանիների ձեռքբերման մատչելիության ապահովման նպատակով պետական աջակցություն կտրամադրվի վարկերի տոկոսադրույքի մասնակի սուբսիդավորման միջոցով: «Վարկերը տրամադրվելու են 5 տարի մարման ժամկետով, առավելագույնը 12 տոկոսով, որից սուբսիդավորվելու է 10 տոկոսը, այնպես, որ շահառուին կտրամադրվի 2 տոկոսով, իսկ իսդկ սոցիալական աջակցություն ստացող սահմանամերձ համայնքների տնտեսվարողներին կամ գյուղոլորտում գործունեություն իրականացնող կոոպերատիվներին՝ զրո տոկոսով»,-ասաց փոխնախարարը:

Նրա խոսքով, ծրագրի շրջանակում ձեռք բերվող մեկ գլուխ տոհմային կենդանու հաշվարկային արժեքը մեկ մլն դրամ է, իսկ ընդհանուր մեր շահառուի առավելագույն չափը՝ 300 մլն դրամ: Այսինքն մեկ տնտեսվարող սուբյեկտը կարող է առնվազն 300 կենդանի ձեռք բերել: «Նախատեսվում է, որ 2019-2024 թվականներին Հայաստանի տնտեսվարողների կողմից ձեռք կբերվի 10 հազար գլուխ խոշոր եղջերավոր կենդանիներ: Համեմատության համար 2013-2018 թվականների ՀՀ է ներմուծվել ընդամենը 2195 կենդանի»,-ասաց Գեւորգյանը՝ հավելելով, որ 5 տարում Հայաստանում կարտադրվի 25 մլրդ դրամի կաթ եւ միս, այսինքն սա մեծ մուլտիպլիկատիվ էֆեկտ է ունենալու եւ բյուջեի վրա դրական է ազդելու: