Արմավիրի մարզում 53-ամյա տղամարդը խոպանից վերադառնալով՝ «անջնջելի այլանդակել» է կնոջ դեմքը

Արմավիրի մարզի ընդհանուր իրավասության դատարանում Արթուր Ադամյանի նախագահությամբ ավարտվել է 1965 թվականին ծնված Ս.Ն.-ի գործի դատական քննությունը:

53-ամյա տղամարդուն մեղադրանք էր առաջադրվել տուժողի առողջությանը դիտավորությամբ ծանր վնաս հասցնելու համար՝ ՀՀ քրեական օրենսգրքի 112 հոդվածի 1-ին մասով:

Տուժողը ամբաստանյալի կինն է:

Դատարանը հաստատված է համարել հետևյալը:

Արմավիրի մարզի գյուղերից մեկի բնակիչ Ս. Ն.-ն ամուսնացել է 1990 թվականին: Կնոջ հետ համատեղ կյանքի ընթացքում երկու երեխա են ունեցել, որոնք արդեն չափահաս են ու ապրում են ծնողներից առանձին:

Համատեղ կյանքի սկզբնական շրջանում Ս.Ն.-ն կնոջ հետ հաշտ է ապրել: Բայց երբ նա 2009 թվականին մեկնել է ՌԴ՝ արտագնա աշխատանքի, կնոջ հետ նրա հարաբերությունները լարվել են:

2016 թվականին Ս.Ն.-ն վերադարձել է Հայաստան, նորից բնակություն է հաստատել իր հայրական տանը: Նույն տանն էր ապրում նաև նրա կինը:

Ամուսինների հարաբերությունները շարունակել են լարված մնալ, նրանք բանավոր պայմանավորվել են, որ ապրելու են առանձին, վարելու են առանձին տնտեսություններ:

Այսպիսով՝ Ս.Ն.-ն կնոջից պաշտոնապես չի ամուսնալուծվել, բայց նա ու կինը, ապրելով Ս. Ն.-ի հայրական տանը՝ նույն հարկի տակ, վարել են առանձին տնտեսություններ:

Դեպքից մոտ մեկ շաբաթ առաջ Ս. Ն.-ն դիմել է կնոջ հորը ու մեկ շաբաթ ժամանակ է տվել, որ կինը հավաքի իրերն ու հեռանա հոր տուն: Սակայն կինը չի հեռացել:

Ըստ դատական ակտի՝ 2018 թվականի հոկտեմբերի 8-ի վաղ առավոտյան՝ ժամը 7-ի սահմաններում, Ս. Ն.-ի կինը արթնացել է սովորականի նման, մտել է խորդանոց, որ «գոմի շորերը» հագնի, գնա անասնագոմ՝ անասուններին խնամելու:

Այդ ընթացքում Ս.Ն.-ն մոտեցել է խորդանոցի դռանը, բացել է այն ու, հենց որ կինը շրջվել է, ամուսինը բռունցքով հարվածել է նրա դեմքին: Այնուհետև Ս.Ն.-ն մազերից քաշել, կնոջը գցել է գետնին, բռունցքով 4-5 անգամ հարվածել է կնոջ դեմքին, որից հետո հատակից վերցրել է դանակը ու սկսել է դրա շեղբով վնասել կնոջ դեմքը…

Արդյունքում՝ Ս. Ն.-ն կնոջ առողջությանը դիտավորությամբ ծանր վնաս է պատճառել, որն արտահայտվել է «կնոջ դեմքի անջնջելի այլանդակմամբ»…

Ս.Ն.-ն առաջադրված մեղադրանքում իրեն լիովին մեղավոր է ճանաչել:

Դատարանը հաշվի է առել, որ Ս.Ն.-ի խնամքին է… չաշխատող կինը, ում առողջությանը՝ «դեմքի անջնջելի այլանդակմամբ», ծանր վնաս է հասցրել տղամարդը:

Դատարանը հաշվի է առել նաև, որ տուժող կինը չի բողոքել, քաղհայցի պահանջ չի ներկայացրել, իսկ Ս.Ն.-ն բնութագրվել է դրական…

Ս.Ն.-ն մեղավոր է ճանաչվել ՀՀ քրեական օրենսգրքի 112 հոդվածի 1-ին մասով և դատապարտվել է 4 տարի ազատազրկման: Նրա նկատմամբ կիրառվել է Համաներման ակտի համապատասխան դրույթը, և նա ազատվել է պատժի կրումից: