Գլխամաշկի խնամքի հինգ սխալ

Աղջիկների մեծամասնության ամենատարածված սխալն այն է, որ մոռանում են հետեւել գլխամաշկի խնամիքին, սակայն մազի որակը հենց դրանից է կախված, դա հիմքերի հիմքն է: 

1. Սխալ ես ընտրում շամպունը 

Մի պարզ կանոն կա, որին շատ աղջիկներ չեն հետեւում. շամպունն ընտրվում է գլխամաշկին համապատասխան, իսկ կոնդիցիոները` մազերի տեսակին: Դա նշանակում է, որ կարող ես դիմահարդարման տարբեր ապրանքանիշերի պատկանող շամպուն եւ բալզամ օգտագործել, օրինակ` երբ գլխամաշկը բավականաչափ ճարպոտ է եւ մանրամասն լվացում է պահանջում, իսկ մազի ծայրերը շատ չոր են: 

2. Գլխամաշկի համար հատուկ շիճուկներ չես օգտագործում  

Գործնականում անիմաստ է գլխամաշկի խնամքի համար դիմակ եւ այլ լվացվող նյութեր օգտագործելը: Ընտրիր այնպիսի շիճուկներ, լոսյոններ եւ գելեր, որոնք քսում են արմատային հատվածին եւ ազդում են մազային ֆոլիկուլների վրա: Այդ միջոցների մեծամասնությունը լվացում չի պահանջում, եւ դրանց արդյունավետությունն  անհամեմատ ավելի մեծ է: 

3. Բավականաչափ չես լվանում գլխամաշկը

Պե՞տք է լվանալ գլխի մաշկը: Անկասկած: Միայն շամպունով գործը գլուխ չի գա, նաեւ պիլինգ է անհրաժեշտ: Նման մաքրման շնորհիվ մաշկի մեջ ակտիվանում են փոխանակման գործընթացները,  հեշտանում է բուժական եւ սնուցող նյութերի մուտքը:  Կարելի է ինչպես ողորկող, այնպես էլ թթուների` գլիկոլային եւ   (կամ) սալիցիլային, AHA-թթուների հիմքի վրա ստեղծված միջոցներ օգտագործել: Ցանկալի է ցանկացած (հատկապես` թթվային) պիլինգը բժշկի հետ ընտրել. յուրաքանչյուրի մաշկը տարբեր է:   Մազերի մասնագետը   թթուների ճիշտ խտությամբ դեղամիջոց խորհուրդ կտա, կսովորեցնի քսել դա եւ կպատմի, թե ինչքան ժամանակ է պետք պիլինգը պահել գլխի վրա: 

4. Սինթետիկ սիլիկոններով շամպուն ես ընտրում 

Մազերի խնամքի շատ միջոցներ սիլիկոններ են պարունակում: Պիտակի վրա   «-կոն» վերջավորությամբ ցանկացած բառ նշանակում է, որ բաղադրության մեջ այս կամ այն տեսակի սիլիկոն կա: Այդ նյութերը վատ համբավ ունեն. դրանք կուտակվում են, ծանրացնում մազերը, հետո էլ վատ են լվացվում:

Սակայն սիլիկոնի ոչ բոլոր տեսակներն են նման ազդեցություն ունենում: Օրինակ, ժամանակակից միջոցներում աներեւակայելիորեն մեծ ժողովրդականություն են վայելում օրգանասիլիկոնները` սիլիկոնային եւ օրգանական միացությունների հիբրիդները  (օրինակ` սիլիկոնային բետաինները): Դրանք մազի մակերեւույթին նուրբ թաղանթ են ստեղծում, որը ոչ միայն հարթեցնում է մազի ռելիեֆը, այլեւ խոպոպներին փայլ է հաղորդում եւ դրանք պաշտպանում է  արտաքին գործոնների ագրեսիայից, մասնավորապես` մազահարդարիչի, արդուկի կամ գանգրացնող ունելու ազդեցությունից: Հետո էլ, օրգանասիլիկոնները հեշտորեն լվացվում են` չկուտակվելով մազերի եւ գլխի մաշկի վրա: 

5. Մազաթափությունը բժշկի գնալու պատճառ է 

Եթե կարծում ես, որ ճիշտ ես հոգ տանում գլխի մաշկին, բայց մազերն այնուամենայնիվ թափվում են, դա առիթ է չզլանալու եւ հետազոտություն անցնելու: Եթե այցելել ես մազերի բժշկի, պատրաստ եղիր, որ բժիշկը կարող է քեզ այլ մասնագետների մոտ ուղարկել: Ոչ մեկի համար գաղտնիք չէ, որ մազերի վիճակն ընդհանուր առողջական վիճակի ցուցիչ է:  

Օրինակ, մազերի թափվելը կարող է աղեստամոքսային տրակտի գործունեության, վահանաձեւ գեղձի գործառույթի խախտման հետեւանք լինել, հորմոնային խանգարումների, ինտոքսիկացիայի, միկրոտարրերի խրոնիկական պակասի հետեւանք, էլ չասած սթրեսների մասին: Այնպես որ, քեզ գուցե անհրաժեշտ լինի խորհրդակցել էնդոկրինոլոգի, գինեկոլոգի հետ, ԳՁՀ, արյան հորմոնային անալիզ անցնել, ինչպես նաեւ արյան կենսաքիմիական անալիզ: Բայց չարժե դրա վրա խնայել ժամանակը, չէ՞ որ առողջությունից եւ դրա հետեւանք գեղեցկությունից ավելի կարեւոր բան չկա:

Իմանալ   ավելին․․․