«Բարսելոնան» Ֆաթիի փոխհատուցումը բարձրացնում է` հասցնելով 400 միլիոն եվրոյի

Իսպանական «Բարսելոնա» ֆուտբոլային ակումբը իր պաշտոնական կայքում հայտնել է, որ հարձակվող Անսու Ֆաթիի պայմանագրի փոխհատուցումը հասցվել է 400 միլիոն եվրոյի: 2019 թվականի դեկտեմբերին Ֆաթին և «Բարսելոնան» վերստորագրեցին պայմանագիրը, որը ուժի մեջ է մինչև 2022 թվականի հունիսի 30-ը։ Այն վերակնքվեց՝ ևս երկու մրցաշրջան երկարաձգելու տարբերակով, բարելավված պայմաններով, համաձայն որի՝ խաղացողի հետգնումը 100 միլիոն եվրոյից հասավ 170 միլիոն եվրոյի: Ենթադրվում էր, որ փոխհատուցման չափը կբարձրացվի մինչև 400 միլիոն, երբ ֆուտբոլիստը պրոֆեսիոնալ պայմանագիր կնքի «Բարսայի» առաջին թիմում՝ որպես լիիրավ ֆուտբոլիստ, ինչը և տեղի ունեցավ։
«Բարսելոնայի» հիմնական կազմում 17-ամյա Ֆաթին անցկացրել է 33 հանդիպում, խփել 8 գոլ: Սպասվում է, որ Ֆաթին, որը վնասվածքի պատճառով բաց է թողել նախամրցաշրջանի մի մասը, կմասնակցի Իսպանիայի առաջնության ընթացիկ մրցաշրջանի «կապտանռնագույնների» առաջին խաղին կիրակի օրը՝ սեփական հարկի տակ՝ «Վիլյառեալի» հետ խաղում: