Այդպես դուխով եք, Ալիևին զանգեք, սպառնացեք

Քաղտեխնոլոգ Կարեն Քոչարյանը գրել է. «Հենց նոր ինձ զանգահարեց անծանոթ համարից ինչ-որ անձնավորություն, որը ներկայացավ որպես ԱԺ պատգամավոր Անդրանիկ Քոչարյան: Ֆեյսբուքյան իմ մի գրառման հետ կապված սպառնում էր հաշվեհարդարով և իրեն պահեց որպես վերջին փողոցային խուլիգան: Ես արդեն դիմել եմ Ոստիկանություն»:

«ՉԻ». Եթե հիշողությունը մեզ չի դավաճանում, Անդրանիկ Քոչարյանը ԱԺ պաշտպանության և անվտանգության հարցերով մշտական հանձնաժողովի նախագահն է: Բայց այս 2,5 տարվա ընթացքում ոնց որ թե չի ըմբռնել, որ ինքը ոչ թե իշխանությունների, այլ երկրի պաշտպանության և անվտանգության հարցերով մշտական հանձնաժողովի նախագահն է:

Դրա համար էլ պատերազմի ելքն այնպիսին էր, ինչպիսին եղավ: Փոխանակ իրենց բուն պարտականություններով զբաղվեին և զբաղվեն, ընկել են նրա հետևից, թե իրենց մասին ով ինչ է գրում: Այստեղ դուխները միլիոն է: Դուխդ միլիոն է, Ռուբեն Հայրապետյանին այդպես պատասխանեիր:

Որ հարցնում ես, թե ինչու Հայաստանն ու Արցախը աղետի հասցրեցիք, կմկմում են, կամ էլ ասում են՝ տանը մարդ չկա: Բայց իրենց քննադատողներին հերոսաբար դիմագրավում են:

Բայց ապշելու բան է: Ադրբեջանը սրանց (իրականում՝ մեզ բոլորիս) ամեն օր աջուձախ չռփում է, ժամը մեկ մի կտոր է պոկում Հայաստանից ու Արցախից, վախում են մի հատ ծպտուն հանեն, Պուտին ձյաձյային են խնդրում, որ մի բան անի, ու այս կիսասատկած վիճակում դեռ հոխորտալու տեղ ունեն: Գոնե նահանջի տեղ թողնեն, որ իշխանությունը կորցնելուց հետո իրենց մի քիչ մարդավարի պատժեն: Սա էլ չեն հասկանում: