Ճապոնիայում հեռուստացույց են ստեղծել, որը կարելի է լիզել եւ համտեսել սնունդը

Ճապոնացի պրոֆեսորը հեռուստացույցի նախատիպ է մշակել, որը կարող է փոխանցել ցուցադրվող սննդի համը։ Դրա համար անհրաժեշտ է լիզել էկրանի մակերեսը, հայտնել է The Guardian-ը։

Մեյջի համալսարանի պրոֆեսոր Գոմեի Միյաշիտան ստեղծել է «Taste the TV» (համտեսել հեռուստացույցը) կոչվող սարքը, որը բուրավետիչներ է պարունակում: Դրանք ցրվում են եւ ստեղծում հեռուստացույցով ցուցադրվող սննդի համը: Այնուհետեւ հեղուկի տեսքով «ճաշատեսակը» քսվում է հեռուստաէկրանի վերեւի հիգիենիկ ժապավենին, որը պետք է լիզել։

«Նպատակն այն է, որ մարդիկ տանը գտնվելիս աշխարհի մյուս ծայրում գտնվող ռեստորան այցելելու պես փորձ ունենան», - ասում է նախագծի հեղինակը:

Պրոֆեսորն աշխատում է 30 ուսանողներից բաղկացած թիմի հետ, ովքեր ստեղծել են ճաշակի հետ կապված բազմաթիվ սարքեր: Միյաշիտայից եւ նրա ուսանողներից մեկ տարի է պահանջվել Taste the TV-ի նախատիպը ստեղծելու համար: Պրոֆեսորի խոսքով, եթե ինքը սկսի սարքի կոմերցիոն տարբերակի արտադրությունը, ապա ցանկացողները կկարողանան այն ձեռք բերել 100 հազար իենով։

Միյաշիտան ծրագրում է ապագայում սոմելյեների եւ խոհարարների համար հեռավար ուսուցման հավելվածներ, ինչպես նաեւ համտեսելու խաղեր եւ վիկտորինաներ թողարկել: