Սինգապուրցի գիտնականները սովորել են գարեջրի թափոններից մայոնեզ եւ պաղպաղակ պատրաստել

Նանյանգի տեխնոլոգիական համալսարանի սինգապուրցի գիտնականները հետաքրքիր կիրառումներ են գտել գարեջրի արտադրությունից հետո մնացած թափոնների համար։ Ինչպես հաղորդվում է գիտական ​​հաստատության պաշտոնական կայքում, գարեջրի մանցորդներից ստեղծվել է բուսական էմուլգատոր, որը ձվի դեղնուցի փոխարեն կարելի է օգտագործել պաղպաղակի եւ մայոնեզի արտադրության մեջ, հայտնել է Planet-today-ը։

Էմուլգատորները սննդի արդյունաբերության մեջ օգտագործվող նյութեր են, որոնք անհրաժեշտ են միատարր կոնսիստենցիա պահպանելու համար: Էմուլգատորները, մասնավորապես, թույլ չեն տալիս, որպեսզի մայոնեզն ու այլ մթերքները շերտավորվեն ու վերածվեն յուղի եւ ջրի:

Սինգապուրցի գիտնականները որոշել են փոխարինել ձվի դեղնուցը, որն օգտագործվում է որպես կայունացուցիչ, էկոլոգիապես ավելի մաքուր բուսական հիմքով: Դրա համար հետազոտողները վերցրել են գարեջրի պատրաստման համար օգտագործվող հացահատիկները, մանրացրել եւ խմորել՝ օգտագործելով Rhizopus oligosporus սունկը: Ստացված զանգվածը չորացրել են եւ ստացել պատրաստի արտադրանք, որը կարելի է ավելացնել պաղպաղակի կամ մայոնեզի մեջ։

Տեխնոլոգիայի հեղինակներն ընդգծում են, որ գարեջրի մնացորդների վրա հիմնված էմուլգատորով պատրաստված մայոնեզն իր համով չի տարբերվում սովորականից։ Միաժամանակ այն պարունակում է զգալիորեն ավելի շատ հակաօքսիդանտներ, ամինաթթուներ եւ մարդու օրգանիզմի համար օգտակար սպիտակուցային միացություններ։ Ապագայում նոր էմուլգատորը կօգտագործվի նաեւ այլ պարենային ապրանքների համար։