Պեկին-2022. Հայաստանի օլիմպիական հավաքականն ավարտեց մրցելույթները (ֆոտո)

Հայաստանի օլիմպիական հավաքականն ավարտեց մրցելույթները Չինաստանի մայրաքաղաք Պեկինում ընթացող 24-րդ ձմեռային Օլիմպիական խաղերում: 6 օլիմպիական ունեցող Հայաստանի թիմը Պեկին հասավ 5 մասնակցով: Վերջին պահին լեռնադահուկորդ Հարություն Հարությունյանի մոտ կորոնավիրուսի թեստի դրական պատասխան էր ստացվել, ինչի պատճառով միակ լեռնադահուկորդը չկարողացավ մեկնել Պեկին: Չնայած մի քանի օր անց Հարություն Հարությունյանի մոտ հաստատվել էր կորոնավիրուսի թեստի բացասական պատասխան, բայց Հայաստանի օլիմպիական կոմիտեն չկարողացավ լուծել Հարությունի Պեկին մեկնելու խնդիրը:

NEWS.am Sport-ի թղթակցի հետ զրույցում Հայաստանի դահուկային սպորտի ֆեդերացիայի նախագահ Գագիկ Սարգսյանն ասել էր, որ օլիմպիական մայրաքաղաք մեկնելու չվերթներ չեն եղել, քանի որ բոլորը չարտերային են եղել, այն էլ մինչեւ հունվարի 31-ը:

Հայաստանը 5 օլիմպիականով մասնակցեց դահուկավազքի եւ գեղասահքի մրցաշարերին:

Դահուկավազքում մրցելույթներ ունեցան Միքայել Միքայելյանը, Կատյա Գալստյանը եւ Անգելինա Մուրադյանը: Գեղասահքում առաջին անգամ Հայաստանը ներկայացուցիչ ունեցավ պարային զույգերի մրցաշարում, որտեղ հանդես եկան Հայաստանի միակ պարային զույգ Թինա Կարապետյանն ու Սիմոն Պրուքս Սենեկալը:

24-րդ ձմեռային Օլիմպիական խաղերում երկու մեկնարկ ունեցավ Միքայել Միքայելյանը: Փետրվարի 6-ին 23-ամյա դահուկավազորդը մասնակցեց սկիաթլոն մրցաձեւի 15 կմ դասական + 15 կմ ազատ ոճերում եւ զբաղեցրեց 47-րդ տեղը: Նրա արդյունքը 1:25:53.7 է: Փետրվարի 11-ին Հայաստանի բազմակի չեմպիոնը մասնակցեց դասակով ոճով 15 կմ դահուկավազքին եւ գրավեց 61-րդ տեղը (43:09.1)։

Երկու մեկնարկ ունեցավ նաեւ Կատյա Գալստյանը: Փետրվարի 8-ին 29-ամյա դահուկավազորդը մասնակցեց արագավազքի որակավորման փուլին:  91 մասնակիցների մեջ Գալստյանը 80-րդ տեղը զբաղեցրեց եւ դուրս մնաց պայքարից: Նրա արդյունքը 4 րոպե 48 վայրկյան է: 

Փետրվարի 10-ին Գալստյանը մրցեց նաեւ 10 կմ դասական ոճում եւ զբաղեցրեց 74-րդ տեղը: Նրա արդյունքն էր 34 րոպե 37.5 վայրկյան: 

Անգելինա Մուրադյանը մասնակցեց իր առաջին Օլիմպիական խաղերին, որը նաեւ 18-ամյա դահուկավազորդի առաջին միջազգային փորձն էր: Մուրադյանը եզրագիծը հատեց 94-րդը։ Նրա արդյունքն է 39 րոպե 43.4 վայրկյան: 

16 տարվա դադարից հետո Հայաստանն առաջին անգամ մասնակից ունեցավ գեղասահքի մրցաշարում: Հայաստանի միակ պարային զույգ Թինա Կարապետյանն ու Սիմոն Սենեկալը հրաշալի ելույթներ ունեցան երկու մրցումային օրերի ընթացքում:

Հայաստանի ներկայացուցիչները 18-րդ տեղը գրավեցին գեղասահքի պարային զույգերի պայքարում։

Կարճ ծրագրում Թինա Կարապետյան ու Սիմոն Սենեկալը 65.87 միավորով 19-րդն էին: Ազատ ծրագրում վաստակեցին 167.03 միավոր:

Հայաստանն առաջին անգամ էր մեծ կազմով մասնակցում ձմեռային Օլիմպիական խաղերին, չնայած նրան, որ լեռնադահուկորդը չկարողացավ մեկնել իր առաջին Խաղերին: Բոլոր 6 օլիմպիականներն էլ նվաճել էին մասնակցության իրավունքը: Սպիտակ քարտով մասնակից չի եղել: Դահուկավազորդներն ու լեռնադահուկորդը վարկանիշային միավորներով էին նվաճել, իսկ Թինա Կարապետյան - Սիմոն Սենեկալ պարային զույգը 2021 թվականի սեպտեմբերի 25-ին Գերմանիայի Օբերստդորֆ քաղաքում անցկացված գեղասահքի Nebelhorn Trophy 2021 օլիմպիական վարկանիշային մրցաշարում էր նվաճել Պեկին-2022-ի ուղեգիր:

Պեկին-2022-ում լավագույն մասնակցությունն ու արդյունքը Թինա Կարապետյան - Սիմոն Սենեկալ պարային զույգինն էր: Հայաստանի պարային զույգը շատ ներկայանալի տեսք ուներ օլիմպիական սառույցի վրա: Կարճ ծրագում նրանք 23 զույգերի մեջ զբաղեցրին 19-րդ տեղը, ազատ ծրագրում 101.16 միավորով 20 մասնակիցների մեջ 16-րդն էին:

Օլիմպիական խաղերում դիրքերը բարելավեց նաեւ դահուկավազորդ Միքայել Միքայելյանը: Փհենչան-2018-ում Միքայելյանը 15 կմ դասական ոճում զբաղեցրել էր 83-րդ տեղը: Պեկինում 22 տեղով առաջ էր:

Իր երրորդ Օլիմպիական խաղերին մասնակցած Կատյա Գալստյանի արդյունքը Պեկինում ավելի ցածր էր: Փհենչանում 10 կմ դասական ոճում նա գրավել էր 72-րդ տեղը: Այստեղ 74-ն էր: