Հրապարակել է 4,4 միլիոն գալակտիկա պարունակող քարտեզ

Աստղագետների միջազգային թիմը հրապարակել է երկնքի նոր քարտեզը, որը պարունակում է տվյալներ 4,4 միլիոն գալակտիկաների մասին, որոնք գտնվում են երկնքի հյուսիսային կիսագնդի մոտ մեկ քառորդը զբաղեցնող տարածքում, հաղորդում է universemagazine.com-ը։

Քարտեզը ստեղծելու համար հետազոտողները յոթ տարի են անցկացրել LOFAR ռադիոաստղադիտակի օգտագործմամբ, որի ընդունիչ կայանները գտնվում են Եվրոպայի 7 երկրներում: Ընդհանուր առմամբ, հավաքվել է 8 պետաբայթ տեղեկատվություն։ Այս տվյալների հետագա մշակման համար գիտնականներն օգտագործել են ամենաժամանակակից ալգորիթմները բարձր արդյունավետությամբ համակարգիչների վրա:

Արդյունքում աստղագետներին հաջողվել է ստեղծել ռադիոպատկեր, որը պարունակում է տվյալներ 4,4 միլիոն գալակտիկաների մասին։ Նոր քարտեզի վրա գտնվող օբյեկտների ճնշող մեծամասնությունը մեզնից միլիարդավոր լուսային տարի հեռավորության վրա է գտնվում եւ պարունակում է գերզանգվածային սեւ խոռոչներ, ինչպես նաեւ ակտիվորեն ձեւավորում նոր աստղեր: 

Հետազոտողների խոսքով՝ հետագայում նրանք նախատեսում են շարունակել LOFAR-ի միջոցով հյուսիսային երկնքի քարտեզագրման գործընթացը։