SpaceX-ը եւս 50 Starlink արբանյակ է ուղարկել տիեզերք

Falcon 9 ընկերությունը փետրվարի 25-ին, ԱՄՆ Արեւելյան ափի ժամանակով ժամը 12.12-ին (Մոսկվայի ժամանակով ժամը 20.12) երկաստիճան Falcon 9 հրթիռ է արձակել՝ 50 Starlink արբանյակներով։ Հրթիռը մեկնարկել է Կալիֆոռնիայի Վանդենբերգ տիեզերակայանից։ Այս մասին գրում է 3dnews.ru-ն՝ հղում կատարելով space.com-ին։

Մեկնարկից մոտ 9 րոպե հետո Falcon 9-ի առաջին աստիճանը վերադարձել է Երկիր եւ ուղղահայաց վայրէջք կատարել «Of Course I Still Love You» անօդաչու լողացող պլատֆորմի վրա, որը գտնվում էր կալիֆոռնիական ափից մի քանի հարյուր կիլոմետր հեռու։ Երկրորդ աստիճանն այդ ընթացքում շարունակում էր օգտակար բեռը դուրս բերել ուղեծիր։ Սա առաջին աստիճանի արդեն չորրորդ արձակումն ու վայրէջքն էր. ավելի վաղ առաջին աստիճանն օգտագործվել էր Sentinel-6 «Մայքլ Ֆրեյլիխ» (Michael Freilich) արբանյակը 2020թ. նոյեմբերին, Starlink 60 արբանյակները 2021թ. մայիսին, ինչպես նաեւ Double Asteroid Redirection Test տիեզերասարքը 2021թ. նոյեմբերին ուղեծիր հասցնելու համար։

Հրթիռի երեկվա արձակումը փետրվարին արդեն երրորդն է Starlink արբանյակների համար. ավելի վաղ՝ փետրվարի 3-ին ուղեծիր էր դուրս բերվել 49 սարք (որոնցից 40-ը մոտ մեկ շաբաթ հետո ոչնչացվել է մագնիսական փոթորկից), իսկ փետրվարի 21-ին ուղարկվել էր 46 արբանյակներից բաղկացած եւս մեկ խմբաքանակ։ Արբանյակների ոչնչացման միջադեպի կրկնությունից խուսափելու համար SpaceX-ը որոշել է հետագայում դրանք ավելի բարձր ուղեծիր դուրս բերել։

Այսօրվա դրությամբ ընկերությունն արդեն արձակել է ավելի քան 2 000 Starlink սարք, եւ սա դեռ ամբողջը չէ. SpaceX-ը դեռ 12 000 արբանյակ արձակելու թույլտվություն ունի, եւ ներկայացվել է լրացուցիչ 30 000-ի հայտ։