ՌԴ միլիարդատերերը մեկ օրում հարստացել են 14 միլիարդ դոլարով. Forbes

ՌԴ 20 ամենահարուստ մարդիկ մեկամսյա դադարից հետո մարտի 24-ին Մոսկվայի բորսայում առևտրի բացման առաջին օրը հարստացել են 14,1 միլիարդ դոլարով, հաշվարկել է Forbes-ը։

Բացարձակ աճի առաջատարներն են «Նովատեկ» գազային ընկերության համասեփականատերեր Լեոնիդ Միխելսոնը և Գենադի Տիմչենկոն։ Առաջինի կարողությունն աճել է 2,5 մլրդ դոլարով՝ մինչև 20,6 մլրդ դոլար, երկրորդին՝ 2,3 մլրդ դոլարով՝ մինչև 17,5 մլրդ դոլար։

«Նորիլսկ Նիկել»-ի համասեփականատեր Վլադիմիր Պոտանինի կարողությունն աճել է 1,9 միլիարդ դոլարով և կազմում է 23,6 միլիարդ դոլար:

Մարտի 24-ին զգալիորեն ավելացել է նաև «Լուկօյլ» նավթային ընկերության գլխավոր սեփականատեր Վագիտ Ալեքպերովի կարողությունը՝ գրեթե 1,5 մլրդ դոլարով՝ հասնելով 19,5 մլրդ դոլարի։ 

Սուլեյման Քերիմովը եզրափակում է բացարձակ աճի առաջին հնգյակը: «Պոլյուս» ոսկու արդյունահանող ընկերության արժեթղթերը մեկ օրում աճել են 10,6%-ով՝ հասնելով 12 300 ռուբլու, ինչի արդյունքում Քերիմովի ընտանիքի կարողությունն ավելացել է 1,25 մլրդ դոլարով՝ մինչև 11,4 մլրդ դոլար։

Մինչ երեկ մոսկովյան բորսայում առևտուրը վերջին անգամ անցկացվել էր փետրվարի 25-ին, ինչից մեկ օր առաջ Մոսկվայի բորսան փակվել էր ռուբլու ինդեքսի մեկ երրորդ անկմամբ, իսկ RTS ինդեքսը նվազել էր 38%-ով։ Այսպիսով, շուկաներն արձագանքել են ՌԴ նախագահ Վլադիմիր Պուտինի՝ Ուկրաինայում հատուկ ռազմական գործողության մեկնարկի մասին հայտարարությանը։