Սկսում եմ սոլո կարիերաս. Անահիտ Ադամյանը՝ կարիերայի, ոճի, «Ну-ка, все вместе» նախագծի և Հայաստան տեղափոխվելու ցանկության մասին

Աշոտ Ղազարյանի թոռնուհին՝ երգչուհի Անահիտ Ադամյանը Tert.am Life-ի հետ զրույցում պատմել է հետագա ծրագրերի, ոճի, «Ну-ка, все вместе» նախագծի և Հայաստան տեղափոխվելու ցանկության մասին:
Այս շրջանում երգչուհին իր միկրոբլոգում քիչ է տեղադրում երգերի քավըր տարբերակներ և մեկնաբանեց՝ ինչով է դա պայմանավորված:
«Նման դադարը պայմանավորված է նրանով, որ այս շրջանում զբաղվածությունս շատ է և սկսում եմ նոր երգեր ձայնագրել՝ սկսելով սոլո կարիերաս»,- ասաց նա:

Երգչուհին տեղեկացրեց՝ պատրաստվում է նոր երգեր ներկայացնել:
«Պատրաստում եմ նաև հեղինակային երգեր և հույս ունեմ, որ իմ լսարանը կհավանի դրանք»,- ասաց նա:
Ինստագրամյան իր էջում երգչուհին պատմում էր, որ պատրաստվում է ընդունել Երևանի Կոմիտասի անվան պետական կոնսերվատորիա:
«Շատ էի ուզում սովորել ու պետք է ասեմ, որ ինձ շատ դուր է գալիս: Հիմա սովորում եմ 1-ին կուրսում»,- ասաց Անահիտ Ադամյանը:

Նա նաև շեշտեց, որ ցանկություն ունի գործունեություն ծավալել Հայաստանում:
«Ես ուրախ կլինեմ, որ ինձ ճանաչեն նաև Հայաստանում, քանի որ ես հայ եմ: Ռուսաստանում ևս ցանկանում եմ գրանցել հաջողություններ, քանի որ այստեղ եմ ծնվել և մեծացել»,- նշեց Անահիտը:
Երգչուհու խոսքով՝ հարազատները նրան շատ են քաջալերում և հպարտանում իր հաջողություններով:
«Պապիկս ինձ շատ է օգնում կարիերայիս հարցում, ես անչափ շնորհակալ եմ նրան ամեն ինչի համար: Բոլորն ուրախ են ինձ համար և հպարտանում են իմ հաջողություններով, չնայած ես կարծում եմ, որ դեռևս չեմ հասել իմ ուզած արդյունքին»,- ասաց նա:

Երգչուհին հաճախ է հարց ու պատասխան իրականացնում իր միկրոբլոգում՝ պատասխանելով մի շարք հարցերի:
«Ես ուրախ եմ, որ կարողանում եմ մոտիվացնել աղջիկներին՝ պատասխանելով իրենց հարցերին: Մտածում եմ, որ եթե ես չլինեի ինքնավստահ՝ չէի կարողանա մոտիվացնել աղջիկներին, մասնավորապես նրանց ովքեր ցածրահասակ են»,- ասաց նա:
Սթորի բաժնում երգչուհին հաճախ է դիմահարդարման հոլովակներով կիսվում, չնայած նրան, որ ինքնուս է:

«Ինքս էլ սկսել եմ սովորել հոլովակների միջոցով, քանի որ միշտ սեր եմ ունեցել այդ ոլորտի նկատմամբ, իսկ հիմա առանց նմանօրինակ հոլովակներ անելու կարողանում եմ դիմահարդարվել և կարծում եմ, որ վատ չի ստացվում, նաև կիսվում եմ իմ դիմահարդարման ընթացքով»,- պատասխանեց Անահիտը:
Շատերը նաև առանձնացնում են Անահիտին՝ ոճային լինելու հարցում:
«Չունեմ ընդգծված և սիրելի ոճ, շատ տարբեր եմ հագնվում՝ մի օր կարող եմ սպորտային հագուստ կրել, իսկ հաջորդ օրը լայն և դասական տաբատ: Ամեն դետալ ու հագուստ ինքս եմ ընտրում, քանի որ ոչ-ոք չի կարող հագուստն իմ համար այնքան լավ համադրել, որքան ես ինքս»,- ասաց երգչուհին:

Թերեզա Հովհաննիսյան