Էժան քայլ․ ինչու են իրականում շահարկում Գուլոյանի անունը

Երկրում կարևորագույն խնդիրները երկրորդականից չտարբերող կամ որոշ դեպքերում նպատակուղղված կերպով շահարկող որոշ լրատվականների վերջին երկու օրերի թոփ թեմաներից էր Կոտայքի նախկին մարզպետ Կարապետ Գուլոյանի ավտոմեքենայի հայտնվելը ՃՈ տուգանային հրապարակում:

Կոնկրետ շրջանակներ առանձնակի խանդավառությամբ էին արձանագրել կատարված փոքրիկ միջադեպը՝ «լուն ուղտ սարքելու ախորժակով»: Իրականում նմանօրինակ թյուրիմացություն կարող է տեղի ունենալ ցանկացածիս հետ: Բնականաբար տեխնիկական խնդիրը վայրկյանների ընթացքում լուծում է գտել:

Այստեղ զավեշտ այն է, որ դա ամեն կերպ շահարկողներն էին հերթ կանգնել, իսկ գիտե՞ք թե ինչու. Որովհետև Կարապետ Գուլոյանը Գագիկ Ծառուկյանի փեսան է և կան լրատվականներ, որոնք «գլուխ են ջարդում», որպեսզի Գագիկ Ծառուկյան անուն ազգանունը հայտնվի իրենց նյութերի վերնագրերում: Լավ, իրոք մեր երկրի խնդիրներն այդքան աննշան են, որ լրատվականները գրելու բան չունե՞ն, թե՞ ոմանք Ծառուկյան ազգանունը իրենց լուրերի վերնագրերում շահարկելը «փեշակ» են դարձրել:

Երկրի համար գոնե առաջին 1000 կարևոր թեմաների մեջ չտեղավորվող այս լուրը մի քանի օր շարադրելն ու տարածելը խայտառակ էժան քայլ է, որից հեղինակները իհարկե ոչ մի դիվիդենտ չշահեցին:

Փաստ է, նման փոքրիկ թյուրիմացություններից ուրախացողները քաղաքական աղբանոցում հայտնվածներն են, և այս տեմպերով շարունակելու դեպքում դեռ երկար կմնան այնտեղ։