Դատավարությունը կարող է «ռեկորդներ» գրանցել․ «Փաստ»

«Փաստ» օրաթերթը գրում է

Իրավաբանները կես կատակ-կես լուրջ նշում են, թե հասարակական-քաղաքական գործիչ Ավետիք Չալաբյանի գործով դատավարությունը կարող է ռեկորդային դառնալ դատավորին ներկայացված ինքնաբացարկի միջնորդությունների մերժումներով: Բանն այն է, որ օրերս հերթական նիստի ժամանակ Չալաբյանի փաստաբանական թիմը արդեն չորրորդ անգամ է ինքնաբացարկի միջնորդություն ներկայացրել դատավոր Մնացական Մարտիրոսյանին, որը ևս «ավանդույթի» ուժով մերժվել է: «Փաստի» հետ զրույցում Չալաբյանը նշեց, որ դատավարության ընթացքում Մարտիրոսյանն այնպիսի քանակի խախտումներ է թույլ տվել, որ իր անաչառությունը ոչ թե պարզապես կասկածի տակ է, այլ իր աչառու լինելն է արդեն անկասկած բոլորի համար։

«Բոլորն են հասկանում, որ նա ոչ թե դատավորի ֆունկցիա է իրականացնում, այլ ինչ-որ առումով մեղադրյալ կողմի ֆունկցիան է լրացնում»,-ասաց Չալաբյանը: Ի դեպ, նշենք, որ նիստից նիստ ավելի ու ավելի է ակնհայտ դառնում գործի «ջուր», սարքովի լինելը: Մասնավորաբար, վկաներից մեկը, որը ներկա է եղել Ավետիք Չալաբյանի և Էմմա Սարգսյանի հանդիպմանը, պատասխանելով հարցին, թե Չալաբյանը առաջարկ հնչեցրե՞լ է գումարով ուսանողներին ներգրավելու մասին, ասել է, որ նման խոսակցություն չի եղել, ավելին՝ «զարմանալի կլիներ, եթե նման առաջարկ լիներ»։

Ի դեպ, խոսելով գործով առանցքային վկա Թոռնիկ Ալիյանի մասին, որի ցուցմունքի վրա էլ «կազմվել» է գործը, նույն վկան նշել էր. «Թոռնիկ անունը հազվադեպ հանդիպող է, դրա համար էլ հիշում եմ, որ հանդիպման ժամանակ շատ հպանցիկ հիշատակվել է անունը` որպես անլուրջ, անգաղափար մարդու, որի հետ առհասարակ առնչություն ունենալ պետք չէ։ Եթե անունը Թոռնիկ չլիներ, չէի էլ հիշի»։

Մանրամասները՝ «Փաստ» օրաթերթի այսօրվա համարում