Հին մեռելների մի զանգված կա, որը խրոնիկ կերպով մոռացության ու անուշադրության է մատնված․ Լիաննա Մանուկյան

ԲՀԿ ՈւԽ նախագահ Լիաննա Մանուկյանը ֆեյսբուքյան իր էջում գրել է․

Հին մեռելների մի զանգված կա, որը խրոնիկ կերպով մոռացության ու անուշադրության է մատնված ու երբ էլ ուրիշ ճար չի լինում իրենց ոչինչ չարժեցող գոյության մասին հիշեցնելու, ապա սկսում են Գագիկ Ծառուկյանի անունը կամ Հիսուս Քրիստոսի արձանը կառուցելու թեման շահարկել: Այդպիսի մեռելներից մեկն էլ տխրահռչակ Գարեգին Միսկարյան կոչվող երևույթն է: Չգիտես ինչ սատանա է մտել Միսկարյանի մեջ, որ Քրիստոսի արձանի կառուցման թեման նրան հանգիստ չի տալիս: Հիմա էլ Գարեգինը որոշել է Գագիկ Ծառուկյանի կողմից Հիսուս Քրիստոսի մոնումենտալ արձան-համալիրի կառուցման հարցով դիմել դատախազություն։ Ինչպես ժողովուրդն է սիրում նման դեպքերում ասել՝ Քամին ցրտից մեռավ:

Դատախազությունով Գագիկ Ծառուկյանին վախեցնելու Գարեգինի ճղճիմ փորձերն ուղղակի ծիծաղելի են: Նախ Ծառուկյան բարեգործական հիմնադրամը բազմիցս հայտարարել է, որ Քրիստոսի արձանի կառուցման բոլոր գործընթացներն արվել ու արվելու են բացառապես օրենքի շրջանակներում, երկրորդ՝ Ծառուկյան բարեգործական հիմնադրամը համագործակցության հուշագիր է սրոտագրել ԿԳՄՍ-ի հետ Հատիսի գագաթին հնագիտական աշխատանքներ իրականացնելու նպատակով, ընդ որում աշխատանքների իրականացման ֆինանսավորումն իրականացվում է Ծառուկյան բարեգործական հիմնադրամի միջոցներով: Այս աշխատանքների ավարտից հետո նոր միայն իրականացվելու են Քրիստոսի արձանի կառուցման աշխատանքները՝ հաշվի առնելով տարածքի հնագիտական ու պատմամշակութային առանձնահատկությունները: Հիմա տրամաբանական հարց է առաջանում՝ ինչո՞ւ է աղմկում Գարեգին Միսկարյանը: Մեծ երևակայություն պետք չէ հարցի պատասխանը գտնելու համար:

Ինչպես ցանկացած սորոսական՝ Գարեգինն էլ տանել չի կարողանում ազգային, ավանդական արժեհամակարգերը, ու ջանք ու եռանդ չի խնայում դրանք քանդելու փորձեր անելու համար, մանավանդ որ գումարն էլ կանխիկով արդեն ստացել է: Բայց Գարեգինը պետք է լավ հասկանա, որ իր մաքսիմումը Հատիսի գագաթին արածող կովերի քանակին անգամ զիջող համակիրներն են, որոնց կարելի է մեկ ձեռքի մատների վրա հաշվել, իսկ Ծառուկյանի ազգանվան շնորհիվ ինքնափիառվելու բոլոր ողորմելի փորձերն էլ դատապարտված են անհաջողության: Այնպես որ, ինչպես ընդունված է ասել՝ սառը ջուր խմիր ու մի թպրտա, թե չէ հոգուդ մեջ եղած սատանան մի օր քեզ լուրջ փորձանքի մեջ կգցի…