Խոշոր հարկատուների ցանկում որո՞նք են առաջատարներն ըստ ոլորտների. «Փաստ»

«Փաստ» օրաթերթը գրում է.

ՀՀ պետական եկամուտների կոմիտեն ներկայացրել է 1000 խոշոր հարկատուների ցանկը՝ 2023 թ. հունվար-սեպտեմբեր ամիսների կտրվածքով: Զուտ թվային կոմպոնենտից զատ, այն հետաքրքիր է նաև իր կառուցվածքի առումով, մասնավորաբար այն տեսանկյունից, թե որ ընկերություններն են առաջատար իրենց ոլորտներում: Ի մասնավորի, հանքարդյունաբերության ոլորտում մրցակցությունից դուրս է Զանգեզուրի պղնձամոլիբդենային կոմբինատը՝ մոտ 52,3 մլրդ դրամ հարկով: ԶՊՄԿ-ն ոչ միայն ոլորտի, այլև ընդհանրապես բոլոր հարկատուների անփոփոխ առաջատարն է:

Ծխախոտի արտադրության առաջատարը վճարված 31 մլրդ դրամ հարկով «Գրանդ տոբակոն» է, որը երրորդն է 1000 խոշոր հարկատուների ցանկում: Ինչ վերաբերում է բանկերին, ապա նրանցից 9-ը առաջին հիսնյակում են, իսկ ոլորտի առաջատար եռյակն այսպիսի կազմ ունի՝ «Ամերիաբանկ», «Արդշինբանկ», «Ակբա»: Ուշագրավ է, որ կապի հայաստանյան երեք օպերատորներն էլ՝ «Տելեկոմ Արմենիան», «Յուքոմը» և «ՄՏՍ Արմենիան», խոշոր հարկատուների լավագույն 30-ի մեջ են:

Ի դեպ, հիշեցնենք, որ Արցախի 097 կոդով հեռախոսահամարները Հանրային ծառայությունները կարգավորող հանձնաժողովի որոշմամբ այսուհետ սպասարկում է «Տելեկոմ Արմենիան», և չի բացառվում, որ հաջորդ հաշվետու ժամանակաշրջանում վերջինիս հարկային ցուցանիշներն ավելի բարձր լինեն, չնայած այս տարվա առաջին ինն ամիսների ցուցանիշներով «Տելեկոմ Արմենիան» արդեն իսկ նախորդ տարվա նույն ժամանակահատվածի համեմատ բավական շատ հարկ է վճարել, ինչպես և, ի դեպ, «Յուքոմը», որը նույն ժամանակաշրջանի համեմատ առաջադիմել է 10 հորիզոնականով:

Ոչ ակլոհոլային խմիչքների ոլորտում առաջատարը «Կոկա-Կոլա Հելլենիկ բոթլերս Արմենիա» ընկերությունն է, ցեմենտի արտադրության ոլորտում՝ «Արարատցեմենտը», հրուշակեղենի ու, ընդհանրապես, այսպես ասած՝ «քաղցրեղենի» ոլորտում՝ «Գրանդ քենդին», իսկ ոգելից խմիչքների արտադրության ոլորտում՝ Երևանի կոնյակի գործարանը: Մսամթերքի արտադրության առումով ընդգծված առաջատարն անփոփոխ է. խոսքը «Աթենք» ընկերության մասին է, որը 2023 թ. առաջին կիսամյակի տվյալների համեմատ վերև է բարձրացել միանգամից 11 հորիզոնականով և լավագույն հարյուրյակում միակն է այս ոլորտում:

Նույնը կարելի է ասել նաև ավիաընկերությունների մասով. այստեղ էլ անվիճելի առաջատար կա՝ «Ֆլայուան Արմենիան», որը լավագույն հարյուրյակում 79-րդն է և դարձյալ «իր տեսակի մեջ» միակը հարյուրի մեջ: Բժշկական կենտրոններից առաջին հարյուրյակում «Էրեբունի» բժշկական կենտրոնն է (91-րդ հորիզոնական), իսկ բուհերից՝ Երևանի Հերացու անվան պետական բժշկական համալսարանը (99-րդ հորիզոնական):

Մանրամասները՝ «Փաստ» օրաթերթի այսօրվա համարում