Արդյո՞ք Հայաստանի իշխանությունների համար «վիճելի» է Ադրբեջանի դեմ սանկցիաների նպատակահարմարության հարցը․ «Փաստ»

«Փաստ» օրաթերթը գրում է.

Որոշ ժամանակ առաջ տեղեկություններ տարածվեցին, որ հայ համայնքի հետ կազմակերպված հանդիպման ժամանակ Ֆրանսիայի նախագահ Էմանուել Մակրոնը հայտարարել է, թե ինքը ավելի շատ ճնշում է բանեցրել Իլհամ Ալիևի նկատմամբ, քան Նիկոլ Փաշինյանը: Այս տեղեկությունը պաշտոնապես չհաստատվեց, բայց և չհերքվեց: Միայն իշխանական քարոզչամիջոցներն էին գտել այդ հանդիպման մասնակից ինչ-որ երիտասարդի, որը հայտարարել էր, թե Մակրոնը նման բան չի ասել: Հետո, անդրադառնալով Ադրբեջանի դեմ պատժամիջոցների հարցին, Մակրոնն ինքն էր նշել, թե հիմա դրա «ժամանակը չէ»:

Ինչպես երևում է, նման կարծիքի են նաև Հայաստանի իշխանությունները: Բացի այն, որ ինչպես բազմաթիվ փորձագետներ են նշում, Հայաստանը բավարար աշխատանքներ չի տանում՝ հասնելու միջազգային հանրության կողմից Ադրբեջանի նկատմամբ որոշակի սանկցիաներ կիրառելուն՝ վերջին կատարած ցեղասպան գործողությունների և այլ հանցագործությունների համար, տարբեր երկրների ներկայացուցիչներ սկսել են մատնացույց անել հենց Նիկոլ Փաշինյանին, որ նա չի ցանկանում հասնել պատժամիջոցների:

Ի մասնավորի, Հայաստանում Կանադայի առաջին ռեզիդենտ դեսպան Էնդրյու Թերները Կանադայի խորհրդարանի արտաքին գործերի և միջազգային զարգացման հանձնաժողովի կազմակերպած «Հայաստանի ու Ադրբեջանի միջև սահմանների անվտանգություն» քննարկման ժամանակ, պատասխանելով Ադրբեջանի նկատմամբ սանկցիաներ կիրառելու հնարավորության մասին հարցին, ասել է, որ հենց Հայաստանում է վիճելի հարցը, թե այդ թեմայով քննարկումներ ծավալելու «համապատասխան ժամանակ» կլինի՞, թե՞ ոչ:

Սա բավական թափանցիկ ակնարկ է, և Հայաստանի իշխանությունները երևի թե պարտավոր են հստակ պատասխպանել՝ արդյո՞ք իրենք «վիճելի» են համարում Արդբեջանի դեմ սանկցիաների կիրառման անհրաժեշտության հարցը, և արդյո՞ք հիմա դա «ժամանակավրեպ» են համարում:

Մանրամասները՝ «Փաստ» օրաթերթի այսօրվա համարում