Բաքուն պատրաստ է վերսկսել Երևանի հետ բանակցությունները․ ԵԱՀԿ ԽՎ նախագահ

ԵԱՀԿ խորհրդարանական վեհաժողովը Հայաստանին և Ադրբեջանին հորդորում է շարունակել բանակցություններն ու փնտրել խաղաղության համաձայնագրին հասնելու նոր հնարավորություններ։ Այս մասին հայտարարեց ԵԱՀԿ ԽՎ նախագահ Պիա Կաուման Երևանում լրագրողների հետ ճեպազրույցի ժամանակ։

 

Նա անդրադարձավ նաև լրագրողների այն հարցին, թե կազմակերպությունն ինչպես է մեկնաբանում ԵԱՀԿ ԽՎ աշնանային նստաշրջանին Ադրբեջանի պատվիրակության բացակայությունը, արդյոք դա չի դիտարկում որպես ապակառուցողական մոտեցում, այն դեպքում, երբ անընդհատ խաղաղության մասին է խոսվում։

 

Կաուման հիշեցրեց, որ մինչ Հայաստանը ժամանելը երկու օրով Ադրբեջանում է եղել և տպավորություն է ստացել, որ նրանք պատրաստ են խաղաղության բանակցություններին։

Նա շեշտեց, որ այդ համաձայնագիրը կարևոր է ոչ միայն երկու երկրների, այլև տարածաշրջանի համար, այդ թվում՝ տնտեսության տեսանկյունից։ Կաումայի խոսքով՝ կան բազմաթիվ հնարավորություններ տնտեսական զարգացման համար, բայց խաղաղություն և անվտանգություն է պետք, հակառակ դեպքում ներդրողները խուսափում են գալ այստեղ։

«Հայաստանի բնակիչներն արժանի են խաղաղության, ժամանակն է խաղաղության համար նոր ուղի գտնելու, մենք՝ որպես կազմակերպություն, աջակցում ենք Հայաստանին խաղաղության այս ուղին գտնելու ճանապարհին»,- նշեց նա։