Ռալֆ Յիրիկյանը՝ Յուքոմ ընկերության գլխավոր տնօրենը, Գիտության և գործարարության օրեր 2023-ի անվանի բանախոսներից է

Դեկտեմբերի 1-ին և 2-ին Երևանի Գաբրիել Սունդուկյանի անվան ազգային ակադեմիական թատրոնում տեղի կունենա ՀՀ Էկոնոմիկայի նախարարության նախաձեռնությամբ անցկացվող «Գիտության և գործարարության օրեր 2023» ամենամյա համաժողովը։ Համաժողովի ընթացքում կայանալու են մի շարք պանելային քննարկումներ արդիական թեմաներով և գիտության ու բիզնես ոլորտում կայացած գործիչների մասնակցությամբ: Վերջիններիս շարքում է Յուքոմ ընկերության գլխավոր տնօրեն, հայտնի հասարակական գործիչ և բարերար  Ռալֆ Յիրիկյանը, ով կներկայացնի գիտության և գործարարության միջև միջոլորտային կամուրջների ստեղծման և փոխգործակցության կարևորության վերաբերյալ թարմ նախագծեր:

Համաժողովը տարվա մասշտաբային միջոցառումներից մեկն է, որը մեկ հարկի տակ է հավաքելու հարյուրավոր գիտնականների և գործարարների, որոնք կքննարկեն Հայաստանում գործարար ոլորտում գիտության ներգրավվածության չափաբաժնի ավելացման, գիտության առևտրայնացման վերաբերյալ տարբեր հարցեր:

Միջոցառման ընթացքում կքննարկվեն նորարարական գաղափարներ և նախագծեր, որոնք միտված են լինելու մեր կյանքի փոխակերպմանը, մարդկությանը սպասվող մարտահրավերներ, հայկական բիզնեսի հաջողության ոգեշնչող պատմություններ և այլ արդիական թեմաներ։

Նախարարության նախաձեռնած այս համաժողովի նպատակն է բացահայտել այն հնարավորությունները, որոնք ունեն  գիտությունն ու գործարարությունը՝ փոխլրացնելով իրար և երաշխավորելով տնտեսության և գիտական մտքի շարունակական զարգացումը: