Հասարակությունը այլընտրանքային ուժերի փնտրտուքի մեջ է. «Փաստ»

«Փաստ» օրաթերթը գրում է.

Վերջին շրջանում ավելի ու ավելի ակտիվ են շրջանառվում տեղեկությունները, թե Նիկոլ Փաշինյանը ցանկանում է գնալ արտահերթ ընտրությունների:

Չնայած իշխանությունները պարբերաբար կտրուկ հերքում են այդ տեղեկությունները, ավելի ճիշտ՝ արտահերթի իրենց ցանկությունը, այդուամենայնիվ, մի կողմից՝ փորձը ցույց է տալիս, որ Նիկոլ Փաշինյանն ու իր թիմը միշտ արել են իրենց հայտարարածի ու խոստացածի ուղիղ հակառակը, մյուս կողմից՝ փորձագետներից շատերը կարծում են, որ նման հերքումները պարզապես այլ քաղաքական ուժերի համար անկանխատեսելիության ու անակնկալի գործոնը մինչև վերջ պահելու նպատակ ունեն: Կան տեղեկություններ, որ նման հնարավորությունը իրականում քննարկվում է արտաքին ուժային կենտրոններում, մասնավորաբար Արևմուտքում:

Սակայն եթե նրանք, հասկանալով, որ Փաշինյանն արդեն գրեթե վարկանիշ չունի, ավելի զգուշավոր են այդ հարցում, ու դիվանագիտական մեր աղբյուրների փոխանցմամբ, քննարկում են արտահերթի պարագայում Փաշինյանին այլ «յուրայինով» փոխարինելու հարցը, ներհայաստանյան քաղաքական դաշտում, կարծես, առաջին հերթին մրցակցություն է այլընտրանքային, այսպես կոչված, «երրորդ ուժի» դաշտում:

Մեզ հետ զրույցում վերջին ամիսներին մի քանի քաղաքագետներ ոչ մեկ անգամ շեշտել են, որ մեր հասարակությունը ևս նման փնտրտուքի մեջ է՝ այս իշխանություններից ձերբազատվելու համար: Միևնույն ժամանակ որոշ փորձագետներ էլ այն կարծիքին են, որ իշխանափոխության հնարավոր է հասնել այն պարագայում, եթե տվ յալ ուժն ունի հստակ արտաքին աջակցություն:

Մանրամասները՝ «Փաստ» օրաթերթի այսօրվա համարում