Արևային վահանակների արտադրության ոլորտում մրցակցությունը սրվում է

Արևային վահանակների արտադրության ոլորտում մրցակցությունը սրվում է, իսկ Եվրամիությունը չի կարողանում ազդել իրավիճակի վրա։ Բանն այն է, որ Եվրոպայում արտադրվող արևային վահանակներն ու մարտկոցները բավական թանկ են, իսկ Չինաստանը ողողել է եվրոպական շուկաներն իր համեմատաբար մատչելի ու շահավետ սարքավորումներով։

Իրավիճակը գրեթե նույնական էր նաև ԱՄՆ-ում, սակայն Սպիտակ տունն արագ կազմակերպվեց, բարձր մաքսատուրքեր մտցրեց չինական սարքավորումների վրա, որպեսզի խթանի արտադրությունն իր տարածքում։ Արդյունքում, ոչ միայն հաջողվեց զսպել չինական արևային սարքավորումների էքսպանսիան, այլև Նահանգներ հրավիրել վահանակների եվրոպական առաջատար արտադրողներին։

Շվեյցարական Meyer Burger Technology ընկերության բաժնետոմսերը նվազել են 47 տոկոսով, երբ ընկերությունը հայտարարել է, որ կարող է փակել Գերմանիայում գտնվող գործարանն ու տեղափոխել այն ԱՄՆ։ Ընկերությունը նշել է, թե վերջնական որոշում կկայացնի փետրվարի երկրորդ կեսին, իսկ Ֆրայբերգում գտնվող գործարանը կփակվի արդեն ապրիլին։ Այդուհանդերձ, նույնիսկ բաժնետոմսերի նվազումը ընկերությանը դժվար հետ պահի որոշումից։

Արևային սարքավորումներ եվրոպական արտադրողները լուրջ վնասներ են կրում, իսկ ԵՄ-ն չի կարողանում ընդհանուր հայտարարի գալ մաքսատուրքերի հարցում։ Արդյունքում, ազատվելով ռուսական նավթի գերիշխանությունից՝ Եվրոպան ընկնում է չինական վահանակների տիրապետության տակ։

Հայաստանում արևային վահանակներ արտադրող մեկ ընկերություն կա՝ «Սոլարոնը»։

Աննա Մարգարյան