«Տաշիր» ընկերությունների խումբը մինչ այսօր ՀԷՑ-ի մասով դիվիդենտ չի ստացել

«Հայաստանի էլեկտրական ցանցեր» ընկերությունը փետրվարի 14-ին մամուլի ասուլիս էր հրավիրել՝ ներկայացնելու 2023 թ. պարտատոմսերի թողարկման և բաշխման արդյունքները, ներդրումային ծրագրի շրջանակում իրականացված աշխատանքը, դրանց նպատակները, ինչպես նաեւ խոսելու առաջիկա ծրագրերի մասին։

ՊԱՐՏԱՏՈՄՍԵՐԻ ԹՈՂԱՐԿՈՒՄ

Ընկերության համար տարին նշանավոր էր նաև պարտատոմսերի թողարկման առումով։ Ընկերությունը պարտատոմսեր է թողարկել` 32 մլրդ դրամի չափով, 11.4% տոկոսադրույքով, 3 տարի մարման ժամկետով և արժեկտրոնի վճարման կիսամյակային պարբերականությամբ: Պարտատոմսերն ամբողջությամբ տեղաբաշխվել են։

Ընկերությունը դարձել է ամենաբարձր վարկանիշով թողարկողը ՀՀ-ում։ Սա խոշորագույն կորպորատիվ դրամային պարտատոմսերի թողարկումն է մեր երկրում։
Ընկերության պարտատոմսերի թողարկման ծավալը եւ եկամտաբերությունը համադրելի են ՀՀ պետական պարտատոմսերի հետ։

Ներդրումները բաշխվել են` ըստ տեղական բանկերի ու այլ ֆինանսական կազմակերպությունների՝ 36,1%, կենսաթոշակային ֆոնդերի կառավարիչների` 53,1%, մանրածախ ներդրողների (ֆիզիկական անձինք եւ ինստիտուցիոնլա ներդրող չհանդիսացող իրավաբանական անձինք)՝ 10,8%` ընդհանուր առմամբ 14 ինստիտուցիոնալ եւ 297 մանրածախ ներդրողի։

Պարտատոմսերի թողարկման նպատակն Ընկերության վարկերի վերաֆինանսավորումն է, ինչպես նաև ներդրումային ծրագրի շարունակականության ապահովումը, որն ուղղված է էլեկտրաէներգիայի կորուստների նվազեցմանը, բաշխիչ ցանցի ընդլայնմանը, գործառնական ծախսերի նվազեցմանը, սպասարկման որակի բարձրացմանը, նոր բաժանորդների միացմանը ցանցին, էլեկտրաէներգիայի հաշվառման համակարգերի արդիականացմանը:

Պարտատոմսերի ձեռքբերման գործընթացը երկրորդային շուկայում առավելագույնս պարզեցված է նաեւ ֆիզիկական անձ ներդրողների համար. շուկայում ՀԷՑ պարտատոմսերը կարելի է գնել Ամերիաբանկի ու Արմսվիզբանկի կողմից ստեղծված համակարգերում:

ՆԵՐԴՐՈՒՄԱՅԻՆ ԾՐԱԳԻՐ

2017 թ.-ից Ընկերությունն իրականացրել է Էլեկտրական ցանցերի արդիականացման և վերակառուցման ավելի քան $680 մլն (այդ թվում՝ ԱԱՀ) արժողության ներդրումային ծրագրեր, որոնք ուղղված են սպառողների էլեկտրամատակարարման որակի բարձրացմանը, էլեկտրաէնեգիայի հաշվառման և վերահսկման սմարթ համակարգերի ներդրմանը, նոր սպառողների՝ էլեկտրական ցանցին միացմանը և այլ կարևոր միջոցառումների իրականացմանը: Ընկերության վարկային պորտֆելը կազմում է $280 մլն: Նշենք նաև, որ 2015թ.-ից Ընկերության ողջ շահույթն ուղղվել է ներդրումներին, ՀԷՑ սեփականատերը դիվիդենտ չի ստացել: Վարկերն էլ ներգրավվել են միջազգային ֆինանսական ինստիտուտների կողմից շուկայականից էապես ցածր տոկոսադրույքով՝ առանց պետական երաշխիքի:

2016-2023թթ. ներդրումային ծրագրով իրականացվել են հետևյալ աշխատանքները՝

1. թվով 41 35/110 կՎ լարման ենթակայանների կառուցում և վերակառուցում,
2. թվով 1265 6/10, 0,4 կՎ լարման բաշխիչ ենթակայանների կառուցում և վերակառուցում,
3. 155 կմ 110/35 կՎ օդային գծերի կառուցում և վերակառուցում,
4. 7650 կմ 6/10, 0,4 կՎ լարման օդային գծերի կառուցում և վերակառուցում,
5. թվով 650.000 հաշվիչի փոխարինում նոր, սմարթ հաշվիչներով,
6. 80.000 նոր բաժանորդի միացում էլեկտրական ցանցին:

Ներդրումների արդյունքում յուրաքանչյուր տարի էներգահամակարգում տնտեսվում է շուրջ 20,3 մլրդ դրամ: Դա արդյունք է էլեկտրաէներգիայի կորուստների 12,8 %-ից 6,6 % իջեցման, աշխատակիցների թվաքանակի և ընթացիկ շահագործման ծախսերի էական կրճատման:

Ընկերության տեխնիկական տնօրենը ներկայացրեց հոսանքազրկումների հետ կապված այսօրվա խնդիրները, խոսեց դրանց հաճախականության, իջեցման դինամիկայի, ձեռնարկվող միջոցառումների ու ապագա ծրագրերի մասին։ Տեսանյութերով ներկայացվեց ինչպես հին, այնպես էլ արդեն վերակառուցված էլեկտրատստեսությունը, խոսվեց նորոգման ենթակա էլեկտրակայանքների ծավալների ու ժամկետների մասին։ Անդրադարձ կատարվեց նաեւ նոր սպառողների՝ ցանցին միացման հարցերին ու դրանց աննախադեպ ծավալների հետ կապված խնդիրներին։

«Բոլոր արտադրական ծրագրային գործողությունները, ցանցերի վերակառուցումն ու վերազինումը, տեխնիկական միացման աշխատանքների իրականացումն ուղղված է էլեկտրամատակարարման հուսալիության բարձրացմանը, անխափանության ապահովմանը: Մեր այսօրվա հիմնական ուղերձը նաև նրանում է, որ ամեն ինչ նայենք հարաբերական բարելավման տեսանկյունից: Մեն կատարում ենք առավելագույն հնարավոր ներդրումները, որոնք տալիս են իրենց արդյունքը և շարունակելու են դրական ազդեցություն ունենալ բոլոր խնդիրների վրա, որոնց մասին այսօր խոսեցինք: Ընկերությունն ունի կայուն տնտեսական վիճակ՝ գնահատված միջազգային Moody’s վարկանիշային կազմակերպության կողմից. այն լավագույնն է ՀՀ տարածքում և լավագույններից է մեր տարածաշրջանում: Մենք պատրաստ ենք հասնելու մեր առջև դրված բոլոր նպատակներին», - նշում է «Հայաստանի էլեկտրական ցանցեր» Ընկերության գլխավոր տնօրեն Կարեն Հարությունյանը:

ՇՈՒԿԱՅԻ ԱԶԱՏԱԿԱՆԱՑՈՒՄ

Խոսելով էլեկտրաէներգետիկ շուկայի ազատականացման մասին՝ ՀԷՑ գլխավոր տնօրենը նշեց.
«էլեկտրաէներգետիկ շուկայի ազատականացումը «Հայաստանի էլեկտրական ցանցեր» ընկերության գործառույթներին որևէ կերպ չի խանգարում, քանի որ Ընկերությունն իր ծախսային մարժան ստանում է բաշխման գործառույթի համար: Թե շուկայում քանի մատակարար ընկերություն կլինի, ՀԷՑ-ի մարժայի վրա որևէ կերպ չի ազդում:

Միևնույն ժամանակ «Հայաստանի էլեկտրական ցանցեր» ընկերությունը շարունակում է մնալ երաշխավորված մատակարար: