Ի՞նչ է ասել Լավրովը Միրզոյանի ականջին

Հայաստանի ԱԳՆ-ն երեկ երեկոյան ուշագրավ տեղեկություն հայտնեց, որ ռուսական կողմի նախաձեռնությամբ տեղի է ունեցել Հայաստանի և Ռուսաստանի արտգործնախարարներ Արարատ Միրզոյանի և Սերգեյ Լավրովի հեռախոսազանգը՝ նշելով, որ հեռախոսազրույցը կայացել է ռուսական կողմի նախաձեռնությամբ, և արտգործնախարարները քննարկել են երկկողմ և տարածաշրջանին վերաբերող հարցեր։

Ռուսական կողմը զրույցի մասին որևէ տեղեկութուն չի հայտնել։ Ընդամենն օրեր առաջ թուրքական Անթալիայում թե՛ Միրզոյանը, և թե՛ Լավրովը մասնակցում էին դիվանագիտական համաժողովին, հանդիպումներ ունենում տարբեր գործընկերների հետ։

Նրանք այդպես էլ որևէ հանդիպում չեն ունեցել Անթալիայում, ընդհակառակն Արարատ Միրզոյանին հանձնարարված է եղել խուսափել այդ հանդիպումներից և անընդհատ ցույց տալ թշնամական վերաբերմունքը Ռուսաստանի արտգործնախարարի նկատմամբ, և ընդամենը 2 օր անց, ռուսական կողմի նախաձեռնությամբ հեռախոսազրույցը և հայկական կողմի չափազանց լակոնիկ արձագանքը վկայում է, որ այս զրույցը եղել է կոշտ տոնայնությամբ և վտանգավոր եզրահանգումներով։

Ի վերջո Հայատանի իշխանություններն արդեն բավականին նյարդայնացրել են պաշտոնական Կրեմլին, որտեղից բացահայտ սպառնալիքներ են հնչում, ընդհուպ հայ–ռուսական հարաբերությունների վերանայման պահանջով։

Միգուցե, Լավրովը փորձել է հենց իր հայ գործընկերոջից հասկանալ՝ ի վերջո Հայաստանը շարունակելո՞ւ է մնալ ՀԱՊԿ անդամ, թե լքելու է անվտանգային այդ դաշինքը, ինչպես և ինտեգրացիոն այլ միավորումները։

Թե ի՞նչ են քննարկել և ի՞նչ ընդհանուր եզրակացության են եկել արտգործնախարարները, չի նշվում։

Անահիտ Մինասյան