Արարատ Միրզոյանի ձախողումը

Ազգային ժողովում արտաքին գործերի նախարար Արարատ Միրզոյանի և ընդդիմության բանավեճը հերթական անգամ վկայեց գործող իշխանությունների նեղացկոտ և դիլետանտ բնույթը։

«Հայաստան» խմբակցության պատգամավոր Արմեն Ռուստամյանի դիտարկմանը, թե Հայաստանը լուրջ խնդիրների կարող է բախվել ՀԱՊԿ-ի հետ հարաբերությունների մասով, Արարատ Միրզոյանը քաղաքական գործչին անհարիր հարցադրում արեց. «Դուք ո՞ւմ կողմից եք, Հայստանի, թե ՀԱՊԿ-ի»։

Ի պատասխան Արմեն Ռուստամյանը նկատել էր, թե ինքն Ազգային ժողովի կողմից է և հարցերը տալիս է որպես Ազգային ժողովի պատգամավոր։

Մեկ այլ պատգամավոր էլ՝ Ագնեսա Խամոյանը, ՀԱՊԿ-ի նկատմամբ Հայաստանի գործող իշխանությունների վարքը նեղացած հարսի տրամաբանություն է որակել։

Լևոն Քոչարյանի գնհատականն ավելի խիստ էր, Հայաստանին համեմատել էր նեղացած կնոջ հետ, որը փորձում է բաժանվել իրեն դավաճանող ամուսնուց։

Ընդհանրապես խոսույթը, որ ձևավորվել է ընդդիմության և իշխանության միջև բացարձակապես հեռու է քաղաքական լինելուց։

Թե՛ խորհրդարանական ընդդիմությունը և թե՛ իշխանությունը, իրար հետ հարաբեվել, բանավիճել, քաղաքակիրթ հարցադրումներ և հարցապնդումներ անելու ընդունակություն չունեն, ինչը բնականաբար ծանր է ազդում Հայաստանի ներքաղաքական մթնոլորտի վրա։

Առաջին հերթին սրա գլխավոր պատասխանատուն հենց իշխանությունն է, որն ամեն գնով դիսկուրսը պահում է նախկինների և ներկաների, ռուսամետների և արևմտամետների շրջանակներում՝ թույլ չտալով բնականոն զարգացում Հայաստանի Հանրապետությունում։

Մարինե Մակարյան