Այս ժողովրդին այլևս ոչ ոք չպիտի խաբի, հուսախաբ անի. Աննա Կոստանյան

Դադարեցրե՛ք շրջանառել «ՈՎ ՈՒԶՈՒՄ Ա ԳԱ,ՄԵՆԱԿ ՆԻԿՈԼԸ ԳՆԱ» կործանարար թեզը, որն այսօրվա ռեժիմի ներկակացուցիչներն օգտագործում էին բոլորիս դեմ 2018-ին, երբ ՀՀ քաղաքացիներն իրոք հոգնած, զզված ու խաբված էին այդ օրվա ռեժիմից (իրականությունից չես փախչի, հիմա ինչ եղել, եղել է)։

Հայ ժողովուրդը պիտի հստակ իմանա՝ ի՞նչ է իրեն սպասվում.

1. արդյո՞ք սահմանազատում-սահմանագծման հակաիրավական, հակասահմանադրական գործընթացը կանգնեցվելու է ու ինչպե՞ս է դա արվելու,

2. ովքե՞ր են լինելու այդ պրոցեսի պատասխանատուները, ՀՀ քաղաքացիների կյանքն ու ճակատագիրը տնօրինողները,

3. ապագա քաղաքական թիմն ի՞նչ դիրքորոշում ունի արտաքին քաղաքական կուրսի վերաբերյալ, ընդորում՝ շատ հստակ, առանց «դե կգանք, կանենք, կտեսնեք»-ների, կա՛մ աջ կա՛մ ձախ կամ նույնիսկ եթե բալանսավորված քաղաքականություն վարելու նպատակ կա, այն շատ հստակ քայլերով, գործողություններով պիտի ներկայացվի

Մենք արդեն մեկ անգամ տեսել ենք «կգանք, կանենք, կտեսնեք»-ներ, «ինչ ուզում ենք, բանակցում ենք», պոպուլիստական «Արցախը Հայաստան է և վերջ» ու նմանատիպ այլ օդում դուրս տված փուչ խոստումներ։ Այս ժողովրդին այլևս ոչ ոք չպիտի խաբի, հուսախաբ անի։

Երեկվանից համաժողովրդական շարժումն իր տրամաբանական քաղաքական փուլի մեջ մտավ, ու հիմա հարթակում կանգնող յուրաքանչյուր քաղաքական «դերակատար» (բացառությամբ Սրբազանի) այլևս պիտի հանդես գա միասնական քաղաքական, կոնսենսուսային օրակարգով՝ վարչապետի աթոռն զբաղեցնողի հրաժարականի տրամաբանության մեջ և որպես դրա շարունակություն։ Բա ի՞նչ էիք ուզում, ո՞նց եք պատկերացնում ապաքաղաքական գործընթաց՝ քաղաքական հարցերի վերաբերյալ ու առանց քաղաքական դերակատարների։