Չինաստանն ամենամեծ արևային էլեկտրակայանն է կառուցելու

Չինաստանն աշխարհի ամենամեծ արևային էլեկտրակայանն է կառուցելու։ Պետական China Three Gorges Renewables ընկերությունը 8 ԳՎտ հզորությամբ էլեկտրակայան է կառուցելու, որի արժեքը գնահատվում է 11 մլրդ դոլար։

Համեմատության համար, Չինաստանում են գտնվում աշխարհի երեք ամենախոշոր արևային էլեկտրակայանները, որոնցից յուրաքանչյուրի հզորությունը 3,5 ԳՎտ է։

Նոր կայանի շինարարությունը սկսվելու է 2024 թ. սեպտեմբերին, իսկ շահագործումը մեկնարկելու է 2027 թ. հունիսին։ Նախատեսվում է կայանը կառուցել Հյուսիսային Չինաստանում, Ներքին Մոնղոլիա ինքնավար շրջանում, Պեկինից 300 կմ հեռավորության վրա։

Բացի արևային էլեկտրակայանից, նախագծում նաև հողմային կայան է լինելու՝ 4 ԳՎտ հզորությամբ, 5 ԳՎտ/ժամ տարողությամբ էներգակուտակիչ, արևի ջերմային էներգիայի կուտակման տեխնոլոգիաներ, նաև 4 ԳՎտ հզորությամբ ածխային կայան։

China Three Gorges ընկերությունը տիրապետելու է բաժնետոմսերի 56 տոկոսին, իսկ էներգիան բավարար կլինի մի քանի մեգապոլիսների ապահովման համար։

Հայաստանն արևային վահանակներ արտադրող մեկ ընկերություն ունի՝ «Սոլարոնը»։

Անուշ Մելիքսեթյան