«Նիկոլ Փաշինյանը կրկնօրինակում է գեբելսյան քարոզչամեքենայի հնարքները, նրան բացարձակ չեն հետաքրքրում Հայաստանի սահմաններին տեղի ունեցող իրադարձությունները». «Փաստ»

«Փաստ» օրաթերթը գրում է.

«Մեզանից ոչինչ կախված չէ 2021 թ.-ի հուլիսին տեղի ունեցած արտահերթ խորհրդարանական ընտրություններից հետո, երբ ամբողջ համաշխարհային հանրություն կոչվածը տեսավ, որ Հայաստանի բնակչության մի մասը կողմ է, որ երկիրը շարունակի ղեկավարել այն անձը, որը Հայաստանը տարավ պարտության: Սա համաշխարհային պատմության մեջ չտեսնված երևույթ է»: Նման կարծիք է հայտնում քաղաքագետ Գագիկ Համբարյանը, երբ անդրադառնում ենք ներկայում տեղի ունեցող իրադարձություններին: «Եթե մինչ այդ շատ պետություններ գոնե ինչ-որ ձևաչափով տարանջատում էին հայ ժողովրդին Հայաստանի իշխանություններից, դրանից հետո բոլորը հասկացան, որ՝ ոչ, հենց Հայաստանի հանրությունն է պատրաստ անցնելու այն այլանդակ, նսեմացուցիչ և նվաստացուցիչ բոլոր գործընթացներով, որն իր համար պատրաստել է Նիկոլ Փաշինյանը՝ որպես պարտված լիդեր: Պատահական չէ, որ Ադրբեջանի նախագահ Իլհամ Ալիևը Հայաստանում 2021 թ. ամռանը տեղի ունեցած արտահերթ խորհրդարանական ընտրություններից հետո մի անգամ շատ հետաքրքիր մեկնաբանություն տվեց՝ ասելով, որ եթե մինչև ընտրությունները Նիկոլն էր պարտված, ապա ընտրություններից հետո պարտված է հայ ժողովուրդը: Այսինքն, ասելիքն այն էր, թե՝ ինքն ընդունում է իր պարտությունը և պետք է անի այն ամենը, ինչ իրեն պարտադրում ենք: Եթե Հայաստանի հանրության և հատկապես նիկոլականների մեծ մասը, սնվելով նիկոլական ժեխնյուզերից, շարունակում է մտածել, որ հզոր և հպարտ ժողովուրդ է, դա արդեն Արևմուտքի, Արևելքի կամ էլ Հարավի խնդիրը չէ, դա մեր խնդիրն է: Այդ ամենի հետևանքները լինելու են աղետալի մեզ համար»,-«Փաստի» հետ զրույցում նշում է քաղաքագետ Գագիկ Համբարյանը:

Անդրադառնալով մեզ հրամցվող շոուներին՝ կարծիք է հայտնում՝ նրանք ոչ մի նորություն չեն անում: «Համաշխարհային պատմության նորագույն շրջանի ամեն մի ուսումնասիրող, որը շատ լավ ծանոթ է ֆաշիստական Գերմանիայի ներքին և արտաքին քաղաքականությանը, այդ թվում՝ Երկրորդ աշխարհամարտում Գերմանիայում տեղի ունեցած իրադարձություններին, կփաստի, որ Նիկոլ Փաշինյանն ուղղակիորեն կրկնօրինակում է գեբելսյան քարոզչամեքենայի հնարքներն ու դրույթները: Օրինակ՝ 1943 թ.-ի փետրվարին, երբ գերմանական բանակը խայտառակ պարտություն կրեց Ստալինգրադի ճակատամարտում, գերմանական հասարակությանը Գեբելսը և նրա քարոզիչները սկսեցին համոզել, որ դա աղետ չէ Գերմանիայի համար, և Գերմանիայում սկսեցին կազմակերպվել մեծ քանակությամբ համերգներ, տոնախմբություններ, շոու ծրագրեր: Եթե ուշադիր լինենք, ապա նույնը եղավ նաև Հայաստանի Հանրապետությունում:

Երկիրը կործանման շեմին է, հանրության զգալի մասը թքած ունի այդ ամենի վրա և մասնակցում է «ֆեստիվառների», գինու և ջազի փառատոնների, ամենօրյա ռեժիմով քեֆ-ուրախություն է հայաստանյան գրեթե բոլոր խոշոր քաղաքներում՝ Երևան, Գյումրի, Վանաձոր, արանքում էլ «ֆեստիվառներ» են անցկացնում Իջևանում, Եղեգնաձորում և այլ քաղաքներում: Սա նպատակ ունի հասարակությանը թմրեցնելու, նրա ուշադրությունը իրական իրավիճակից շեղելու, իրական վտանգների նկատմամբ բթացնելու: Այն, ինչ անում է Նիկոլը, ամբողջությամբ տեղավորվում է ֆաշիստական Գերմանիայի թիվ մեկ քարոզիչ Գեբելսի ուսմունքի սահմանների մեջ: Նա ոչ մի նոր բան չի անում: Այն, ինչ Ադոլֆ Հիտլերը և նրա թիվ մեկ քարոզիչ Գեբելսն անում էին Գերմանիայի հասարակության նկատմամբ 20-րդ դարի 30-40-ական թվականներին, նույնն անում է Նիկոլ անհողը հայաստանյան հասարակության նկատմամբ 21-րդ դարի 20-ական թվականներին: Նույնիսկ Հիսուսին նմանվելը գեբելսյան ոճն է: Գեբելսը և իր քարոզիչներն անընդհատ գերմանական հասարակությանը համոզում էին, որ Ադոլֆ Հիտլերն իրենց ժամանակակից Հիսուս Քրիստոսն է: Նույնիսկ այս պարագայում ենք տեսնում, որ նա այլ հերոս չի փնտրում, իրեն նույնիսկ այլ հերոս պետք չի: Գրքային տարբերակով «թխել» են գեբելսյան քարոզչությունը և կետ առ կետ անցկացնում են Հայաստանի Հանրապետությունում»,-նշում է քաղաքագետը:

Հայաստանում քաղաքական ղեկավարների կողմից այս շոուների ապահովումը տեղի է ունենում մի ժամանակաշրջանում, երբ տարածաշրջանում պայթյունավտանգ իրավիճակ է: «Տարածաշրջանն անորոշ իրավիճակում է, ոչ մի նորմալ մարդու մոտ չի կարող հանգստություն լինել այն պարագայում, երբ Իրանի նախագահի երդմնակալության ժամանակ «Համասի» առաջնորդ Իսմայիլ Հանիեի սպանության համար Իրանը մինչև հիմա չի պատասխանել: Բոլորը սպասում են այդ պատասխանին, քանի որ շատ լավ հասկանում են՝ անհնար է, որ Իրանը չպատասխանի, եթե չպատասխանեց, նրա միջազգային վարկանիշը կհավասարվի հողին: Պատասխանի այս երկարատևությունն ավելի է նյարդայնացնում: Տարածաշրջանի երկրների արտգործնախարարներն իրենց ամբողջ աշխատակազմով աշխատում են 7 օր/24 ժամ ռեժիմով, Հայաստանի Հանրապետության արտաքին գործերի նախարարի պաշտոնը զբաղեցնողն ընտանիքի հետ հանգստանում է Շոտլանդիայում, այն պարագայում, երբ անմիջական սահման ունենք Իրանի հետ: Իրանը շատ պարզ ակնարկում է, որ Իրանում տեղի ունեցող գործընթացներն իրականացվում են ոչ թե բուն Իսրայելի, այլ տարածաշրջանի երկրներից մեկի տարածքից: Բոլորը շատ լավ հասկանում են, որ դա Ադրբեջանն է, շատերն էլ շատ լավ գիտեն, որ դա Ադրբեջանի կողմից օկուպացված Արցախի հատկապես հարավային շրջաններն են, որտեղ 44-օրյա պատերազմից հետո Ադրբեջանի նախագահը, այն պարագայում, երբ այդտեղ բնակչությունը զրո է, կառուցել է երկու միջազգային օդանավակայան: Խոսքը Զանգելանի և Ֆիզուլիի մասին է: Թե ո՞ւմ համար են կառուցվել միջազգային այդ օդանավակայանները, շատ լավ հասկանում ենք: Բայց Հայաստանի սահմաններին տեղի ունեցող իրադարձությունները բացարձակ չեն հետաքրքրում Հայաստանի ղեկավարությանը»,-հավելում է մեր զրուցակիցը:

Երկրի ներսում գրեթե բոլոր ոլորտներում քաոտիկ իրավիճակ է, հատվածական բողոք է հասունանում: Իշխանության վարկանիշն ընկել է՝ հասնելով պատմական մինիմումին: Մյուս կողմից հասկանում ենք, որ իշխանությունները պատրաստվում են 2026 թ.-ի խորհրդարանական հերթական ընտրություններին: Գուցե նաև արտահերթ, սա ևս բացառված չէ: Ո՞րն է վերընտրվելու նրանց հույսը: «Հույսը նաև կեղծիքն է: Նիկոլ Փաշինյանն արդեն քարոզարշավ է անում: Պետք է ընդունենք, որ նիկոլականներ կան. նրանց տոկոսը մեծ չէ, բայց նրանք կան, ինքնախաբեությամբ չպետք է զբաղվենք: Պետք է նշել, որ նիկոլականների մեջ մտնում են այն բոլոր պաշտոնյաները, որոնք ծառայում են Նիկոլի ռեժիմին, և այն մարդիկ, որոնք իբր քաղաքականությամբ չեն զբաղվում, բայց դրանով աջակցում են Նիկոլին: Բացարձակ չզարմանաք, որ այդ մասսան գնա Նիկոլին ընտրելու, բայց դա այն «50+1» տոկոս ձայնը չէ: 2021 թ.-ին Նիկոլն ընտրվել է կեղծիքներով, չմտածեք, թե կեղծիք չի եղել: 2021 թ.-ին բանակում ծառայած բազմաթիվ տղաներ, իմ հարցին ի պատասխան, ասել են, որ ընտրել են Նիկոլին և ընտրել են բաց, որովհետև իրենց հրամանատարները պահանջել են բաց քվեարկություն: Նիկոլին սպասարկող Հայկական զինուժի հրամանատարական կազմը զինվորներին պարտադրում է ընտրել բաց քվեարկությամբ: Բացարձակ պետք չէ զարմանալ, որ Նիկոլը վերարտադրվեց նաև 2021 թ.-ին: Նրանք օգտագործում են այն բոլոր կեղտոտ հնարքները, որոնք եղել են ՀՀԿ-ի կառավարման տարիներին: 2021 թ.-ի արտահերթ խորհրդարանական ընտրություններին Շիրակի մարզի հյուսիսային գրեթե չբնակեցված գյուղերը հազարներով ընտրողներ ունեին: Որտեղի՞ց այդ ընտրողները եկան: Դա այն բոլոր ընտրողներն են, որոնք ՀՀԿ-ի օրոք ստացան ընտրելու իրավունք, նրանք Ջավախքի հայությունն են ներկայացնում և ունեն երկու անձնագիր: Հիմա այդ նույն ընտրողներն ակտիվ մասնակցում են Նիկոլի իշխանության վերարտադրմանը: Նայեք 2021 թ.-ի ընտրությունների արդյունքները Շիրակի մարզի հյուսիսային գյուղերի վերաբերյալ: Մտնում ես գյուղ, 5-6 մարդ է, ընտրություններին 60-70 մարդ է մասնակցում: Գյումրիում երկրաշարժի ժամանակ փլուզված շենքերի հասցեներով մարդիկ, կրկնակի անձնագիր ստանալով, մտնում էին ընտրության, ինչպես եղել է նախկինների օրոք: Համոզված եմ, որ նույնն իրականացվելու է նաև 2026 թ.-ին»,-եզրափակում է Գագիկ Համբարյանը:

Մանրամասները՝ «Փաստ» օրաթերթի այսօրվա համարում