Դիմագրավել երկրի ապամոնտաժման քաղաքականությանը. ի՞նչ ծրագրեր ունի նոր ձևավորված շարժումը, և ովքե՞ր են համախմբված նրա շուրջ. «Փաստ»

«Փաստ» օրաթերթը գրում է.

Նախօրեին Երևանում տեղի ունեցավ «Հայաստանը ես եմ» նախաձեռնության բացման արարողությունը: Նախաձեռնության ղեկավարը Աուդիտորների պալատի նախագահ Նաիրի Սարգսյանն է: Նրա խոսքով, «Հայաստանը ես եմ» նախաձեռնությունն առաջին հերթին անհատական և խմբային պատասխանատվություն է:

«Այսօր Հայաստանը կանգնած է գոյաբանական խնդիրների առջև, ու այս նախաձեռնությունը մեր արձագանքն է այն իրականությանը, որ այսօր ստեղծվել է Հայաստանի Հանրապետությունում: Այն հիմնադրվել է, որպեսզի դիմագրավի, խոչընդոտի և կիրառական քայլեր ձեռնարկի այն գործողությունների դեմ, որոնք այսօր ապամոնտաժում են հայկական պետությունը»,-ասում է Նաիրի Սարգսյանը:

Վերջինս նաև ընդգծում է, որ ՀՀ արտաքին քաղաքականության օրակարգի թիվ մեկ հարցը պետք է լինի Արցախի հակամարտությունը, Ռուսաստանի հետ ռազմավարական համագործակցությունը, Ռուսաստանի հետ հարաբերություններում Արևմուտք-Ռուսաստան և Արևմուտք-Չինաստան հարաբերություններն ու դրանցում առկա նրբությունները հաշվի առնելը, Իրանի հետ հավասարակշռված, փոխշահավետ, ազնիվ քաղաքականության ապահովումը և այլն:

Ի դեպ, նշենք, որ այս նախաձեռնության շուրջ հավաքված են իրենց ոլորտներում փորձ ունեցող, ճանաչված մասնագետներ, որոնք հանրությանը հայտնի են իրենց անձնային որակներով, կրթությամբ, կատարած աշխատանքով, նաև քաղաքական հաստատուն սկզբունքներով։

Մանրամասները՝ «Փաստ» օրաթերթի այսօրվա համարում