«Փաստ» թերթը ութ տարեկան է. «Փաստ»

2016 թվականի նոյեմբերի 8-ին լույս տեսավ «Փաստ» թերթի առաջին համարը: Այդ օրերին թերթի հիմնադիր Վարուժան Բաբաջանյանն ասել էր, թե այն կարծիքին չէ, որ թերթի ձևաչափը կորցրել է իր պահանջարկը հասարակությունում: «Համաձայն չեմ, որ թերթը «մեռնող» մշակույթ է, քանզի ընթերցողը կարիք ունի ավելի փաստարկված և ավելի կայուն լրատվամիջոցների: Լրատվական կայքերի դեպքում արագության մրցավազք կա, և լինում են դեպքեր, երբ ցավալիորեն հետին պլան է մղվում լրատվամիջոցների՝ ճշգրիտ տեղեկություն տարածելու սկզբունքը:

 

Մեր խնդիրն ու թերթի ռազմավարական նպատակներից մեկը արագության մրցավազքին զուգահեռ ճիշտ և փաստարկված լրատվություն հրապարակելն է»: Ժամանակը ցույց տվեց, որ Բաբաջանյանն իրավացի էր: Այս տարիներին թե՛ «Փաստը», թե՛ տպագիր այլ լրատվամիջոցներ ցույց տվեցին, որ, չնայած էլեկտրոնային տեղեկատվության տարածման ու լրատվամիջոցների զարգացման ինտենսիվ տեմպերին, «տպարանաբույր» թերթերն իրենց ուրույն տեղն ունեն:

 

Ութ տարի շարունակ «Փաստը» փորձել է հավատարիմ մնալ իր հիմնական սկզբունքներին, այն է՝ սատար լինել արժեհամակարգերի պահպանմանը, մշտապես պահել այն բոլոր «կարմիր գծերը», որոնք որդեգրել ենք ինքներս մեզ համար, և որոնց վաղուց ծանոթ է մեր ընթերցողը, դուրս չգալ լրագրողական էթիկայի նորմերի սահմաններից, և ամենակարևորը՝ միշտ պահպանել խոր հարգանքը սեփական ընթերցողների հանդեպ: Ստացվե՞լ է, արդյոք, կամ որքանո՞վ է ստացվել, մեր որոշելիքը չէ, այլ նույն ընթերցողների...