«Լոս Անջելեսից տարհանել են Սան Դիեգո, իսկ առանց հսկողության տները թալանվում են»․ ի՞նչ իրավիճակ է Կալիֆորնիայում

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Գրեթե մեկ շաբաթ Լոս Անջելեսում շարունակում են խոշոր հրդեհները, առնվազն 24 մարդ է զոհվել, իսկ 13 մարդ անհետ կորած է համարվում։ Ավերվել է ավելի քան 12300 շենք, որոնց շարքում են դպրոցները, եկեղեցիները, բնակելի մարդկանց տները։ Ըստ ամերիկյան ԶԼՄ–ների՝ հրդեհների ընդհանուր մակերեսը գերազանցել է 16 հազար հեկտարը։

Իսկ տեղահանվածների թիվը կազմոմ է մոտ 153 հազար։  Լոսանջելեսաբնակ Տաթև Հակոբյանը, ով տեղահանվածներից մեկն է, MediaHub-ի հետ զրույցում նշեց, որ իր ընտանիքը ստիպված տեղահանվել է։

«Մեր ընտանիքի մի մասը բնակվում է Գլենդելում, իսկ ես իմ ամուսնու հետ մոտ էինք հրդեհավտանգ շրջանին, երկու օր առաջ մեզ ասացին, որ պետք է տարհանվենք, տարհանվել ենք և ապաստարան են տրամադրել Սան Դիեգո քաղաքում»,– նշեց մեր զրուցակիցը։

Նրա խոսքով՝ այժմ իրավիճակը Լոս Անջելեսում ավելի հանգիստ է։ «Այսօր արդեն կարողացել ենք հետ վերադառնալ մեր բնակարան, չնայած դեռ հրդեհները շարունակվում են, սակայն, բարեբախտաբար, մեր տանը ոչինչ չի եղել, իսկ հրդեհը մեր շրջանից հեռվացել է»,– նշեց նա։

Մի քանի օր առաջ ամերիկյան ԶԼՄ–ները գրում էին, որ Կալիֆորնիայում հարյուրավոր գողեր թալանում են շքեղ տները, որոնք մնացել են առանց հսկողության հրդեհների ժամանակ․ արդյո՞ք դա ճիշտ նորություն է։ «Շատ են ասում դրա մասին, և, որպես այստեղի բնակիչ, անգամ համոզված եմ, որ թալանվում են, մասնավորապես, լավ թաղամասերի տները։ Ասում են՝ ոստիկանությունն այժմ ոչինչ չի կարող անել, քանի որ տարածքները հրդեհավտանգ են, ոստիկանությունը զբաղված է մարդկանց օգնելով, նշում են, իհարկե, որ ձերբակալվածներ կան տարբեր հանցագործությունների համար, և անգամ գողություն իրականացնելու»,– ասաց մեր զրուցակիցը։

Ինչպես հայտնում են ամերիկյան ԶԼՄ–ները, չորեքշաբթի երեկոյան քամին կուժեղանա, ինչը կարող է էլ ավելի բարդացնել աշխատանքը։

Իսկ MediaHub-ը շարունակում է հետևել իրադարձություններին, մենք տեղեկացնում ենք զարգացումների մասին։

Մարիաննա Արամյան

Հետևեք մեզ՝ այստեղ