Կմեկնի՞ Փաշինյանը Դավոս, թե՞ ոչ

Մոտ մեկ շաբաթ առաջ Նիկոլ Փաշինյանի խոսնակը հայտարարեց, թե վարչապետ Նիկոլ Փաշինյանը հունվարի 20-ին կմասնակցի Դավոսի համաշխարհային տնտեսական ֆորումին: Համաշխարհային տնտեսական ֆորումը (WEF) շվեյցարական ոչ կառավարական կազմակերպություն է։ Այն 1971 թվականից ամենամյա հանդիպումներ է անցկացնում բիզնեսի առաջատար ներկայացուցիչների, քաղաքական առաջնորդների ու տարբեր ոլորտների փորձագետների հետ: Այս տարի այն անցկացվում է «Համագործակցություն խելացի դարաշրջանի համար» խորագրի ներքո։ Ֆորումը կտևի մինչև հունվարի 24-ը։

Նախատեսվում է, որ ֆորումին այս տարի կմասնակցեն ավելի քան 350 կառավարությունների ղեկավարներ, այդ թվում՝ 60 պետությունների ղեկավարներ։ ԱՄՆ նորընտիր նախագահ Դոնալդ Թրամփը ֆորումին կմիանա տեսակապի միջոցով։

Հրավեր էր ուղարկվել նաև Ադրբեջանի նախագահին։ Ալիևը դեռ երեկ է մեկնել Դավոս, արդեն հանդիպումներ ունեցել տարբեր երկրների ղեկավարների հետ։ Գերմանիայի կանցլեր Օլաֆ Շոլցի հետ հանդիպմանը քննարկել են Ղազախստանում ադրբեջանական ինքնաթիռի կործանման հետաքննության ընթացքը, Բաքու-Բեռլին հարաբերությունները, Ադրբեջան-Եվրամիություն գործակցության զարգացման հեռանկարը և այլ հարցեր։ Օլաֆ Շոլցը հայտարարել է, որ Գերմանիան աջակցում է Հարավային Կովկասում խաղաղության և կայունության հաստատման ջանքերին։

Այսօր հունվարի 22-ն է, Փաշինյանը դեռ չի մեկնել, պաշտոնական հաղորդագրություն էլ չկա՝ կմեկնի՞, թե՞ ոչ։ Ավելին, այսօր Խորհրդարանում Աժ-կառավարության հարցուպատասխանն է լինելու, և ՀՀ վարչապետը, ըստ Սահմանադրության, պարտավոր է մասնակցել հարցուպատասխանին։

Փաստացի, Փաշինյանը հրաժարվում է մեկնել Դավոս, հանդիպել «սիրելի» Արևմուտքի ներկայացուցիչների հետ։ Ի դեպ, շշուկներ կային, որ Դավոսում կարող է Փաշինյան-Ալիև հանդիպում կայանալ։ Ըստ ամենայնի, այդ հանդիպումից խուսափելու համար էլ նա չի մեկնում Դավոս։ 

Արևիկ Ոսկանյան