Ադրբեջանը լկտիանում է. Ռուսաստանը քաղում է իր ցանածի պտուղները

Նախօրեին ՌԴ ԱԳՆ է կանչվել Ադրբեջանի դեսպան Ռահման Մուստաֆաևը «ադրբեջանական ԶԼՄ-ներում մի շարք հակառուսական հրապարակումների, ինչպես նաև Բաքվում «Ռուսական տան» դեմ ապատեղեկատվության արշավի առնչությամբ»: Այս մասին ասված է ռուսաստանյան գերատեսչության հաղոդրագրությունում։

Օրերս Baku TV հեռուստաալիքը ռեպորտաժ էր հրապարակել, որում լրագրողը Բաքվում գործող «Ռուսական տուն» կազմակերպությանը մեղադրում էր մշակութային, հումանիտար գործունեության քողի տակ հակաադրբեջանական լրտեսության համար:

Դեսպանի հետ զրույցում ՌԴ ԱԳՆ փոխնախարար Միխայիլ Գալուզինը պնդել է՝ մեղադրանքները բացարձակ անհիմն են։ 

Թվում էր՝ միջադեպը դեսպանի հետկանչով կավարտվեր, բայց Բաքուն Մոսկվային կոշտ է պատասխանել։ 

Ռուսաստանի դեսպան Միխայիլ Եվդոկիմովն էլ կանչվել է Ադրբեջանի արտաքին գործերի նախարարություն։ Հանդիպման ընթացքում նշվել է, որ «ապատեղեկատվական նյութերի հրապարակումը և Ադրբեջանի դեմ ուղղված ռեպորտաժների հեռարձակումը ռուսական մամուլում», ինչպես նաև Ռուսաստանի որոշ պաշտոնական շրջանակների կողմից տարակուսանք է առաջացնում: Ընդգծվել է, որ նման գործողությունները հակասում են երկու երկրների միջև դաշնակցային փոխգործակցության մասին հռչակագրի բովանդակությանը և ոգուն։

Այսկերպ Ադրբեջանը պատասխանում է իր ռազմավարական դաշնակից Ռուսաստանին՝ հայելային պատասխան տալով։ Թե ո՞րն է Բաքվի այս լկտիացման իրական պատճառը, և ինչո՞ւ է կտրուկ սրում հարաբերությունները, կարելի է տարբեր վարկածներ առաջ քաշել, բայց փաստը մնում է փաստ, որ Հայաստանի փոխարեն Ադրբեջանի հետ հարաբերությունները բարելավելու՝ Մոսկվայի քաղաքականությունը ձախողվել է։ Իսկ Հարավային Կովկասում ՌԴ քաղաքական ձախողումների համար Կրեմլում դեռ ոչ ոք պատասխանատվություն չի կրել։ 

Սվետա Սամսոնյան