Նոր պատերազմի «նախերգանք»՝ Նիկոլ Փաշինյանի կատարմամբ

Հայաստանի վարչապետի պաշտոնը զբաղեցնող Նիկոլ Փաշինյանը Ֆրանսիա մեկնելուց առաջ ծավալուն մի հոդված է հրապարակել, որի տողատակում կարելի է կարդալ մեկ բան։ Այն է՝ Փաշինյանը հայ ժողովրդին հերթական պատերազմի է տանում՝ դրա համար դույզն-ինչ չնախապատրաստվելով։

Ըստ Փաշինյանի, Հայաստանն Ադրբեջանի դեմ ոչ մի ռազմական գործողության ծրագիր, մտադրություն, նպատակ չունի: «Այո, որովհետև Հայաստանի Հանրապետության անվտանգության դեմ սպառնալիքներ գեներացվում են հենց Ադրբեջանում: Նախ, ի հեճուկս Պրահայի պայմանավորվածության Ադրբեջանի բարձրագույն օղակներից հնչում են Հայաստանի Հանրապետության տարածքային ամբողջականությունը կասկածի տակ առնող հայտարարություններ»,- նշել է նա:

Փաշինյանը հատուկ հիշատակել է «Արևմտյան Ադրբեջան» խոսույթ, որում ձևակերպված են հակահայկական հայտարարությունները։ Այդ խոսույթը հովանավորվում է Ադրբեջանի բարձրագույն ղեկավարության կողմից և համանուն կազմակերպության հիմնարար փաստաթղթերում Հայաստանի Հանրապետության ինքնիշխան տարածքի շուրջ 60 տոկոսն անվանվում է «ներկայումս Հայաստանի Հանրապետության վերահսկողության ներքո գտնվող տարածքներ» կամ «ներկայումս Հայաստանի Հանրապետություն կոչվող քաղաքական և իրավական միավորի կողմից վերահսկվող տարածք»: «Հիմա սա համադրենք Բաքվում ընթացող թատերականացված դատավարության, Ադրբեջանի կողմից միլիարդների հասնող սպառազինությունների ձեռքբերման, և պաշտոնական Բաքվի ագրեսիվ հռետորաբանության հետ և հասկանալի կդառնա, որ Հայաստանի Հանրապետության անվտանգության դեմ Ադրբեջանում գեներացվում են իրական սպառնալիքներ»,- նշում է Փաշինյանը, որպես լուծում էլ կրկին առաջարկելով խաղաղության պայմանագիր կնքել։

Փաստացի, ինքն էլ ընդունում է իր «խաղաղության օրակարգի» ձախողումը, բայց 44-օրյա պատերազմից հետո ՀՀ իշխանությունը ոչինչ չի արել երկրի պաշտպանունակությունը բարձրացնելու համար։ Եվ այժմ արձանագրում է, որ Ադրբեջանը պատրաստ է պատերազմ սկսելուն, իսկ Հայաստանը պաշտպանվելուն՝ ոչ: 

Ամալյա Անդրեասյան