Փաշինյանը խոստովանեց դավաճանությունը

Արցախյան երկրորդ պատերազմը տանուլ տված, Արցախն Ադրբեջանին հանձնած իշխանությունը պարբերաբար հայտարարում է, թե բանակցային գործընթացն այնպես է ընթացել, որ այլ տարբերակ չի ունեցել։ Պատերազմից գրեթե 4,5 տարի անց, սակայն, Փաշինյանն անձամբ է խոստովանել, որ կարգավորման փաստաթուղթ է եղել, որը մերժվել է իր իսկ իշխանության կողմից։ Այն ընդունելու, թեկուզ ցավոտ փոխզիջումներով հարցը կարգավորելու, Արցախն էլ հավերժ հայկական պահելու փոխարեն Փաշինյանը նախընտրել է իրեն «գժի տեղ» դնել, սկսել «զրոյական կետից»։

Օրերս վարչախմբի պարագլուխը հաստատել է, որ 2019 թվականի հունիսին՝ իր պաշտոնավարման երկրորդ տարում, ԵԱՀԿ Մինսկի խմբի կողմից ներկայացված ղարաբաղյան հակամարտության կարգավորման փաստաթուղթ եղել է սեղանին։ Ի դեպ, 2019-ի դեկտեմբերին նա հակառակն էր պնդում։ 2021-ին ԵԱՀԿ Մինսկի խմբի ռուսաստանցի համանախագահ Իգոր Պոպովը ՌԴ ԱԳՆ կայքում նշել էր, որ համանախագահները 2019-ի հունիսին կողմերին են փոխանցել կարգավորման տարբերակի վերջին խմբագրումները:

ԱԺ Եվրաինտերգրման հանձնաժողովի նախագահ Արման Եղոյանը խոստովանել է, որ համանախագահների առաջարկածը եղել է, այսպես կոչված, «Լավրովի պլանը», որը հայկական կողմը մերժել է։ Դրա հետևանքով Հայաստանն ու Արցախը մոտ 5 հազար զոհ են տվել, Արցախն այլևս հայկական չէ, Ադրբեջանն էլ նկրտումներ ունի ընդհուպ ՀՀ տարածքի վրա։ Ի՞նչ է սա, եթե ոչ դավաճանություն։ 

Արմինե Երանոսյան