«Մինչև չգա հետինը, չի հիշվի առաջինը». Աբրահամյանի կառավարության ժամանակաշրջանում անհատ ձեռներեցների և առևտրականների համար լավագույն պայմաններ էին

Հարկային օրենսգրքի փոփոխություններով պայմանավորված բողոքի ակցիաները կառավարության շենքի մոտ շարունակական են լինելու:

Ձեռնարկատիրությամբ զբաղվող մարդկանց զայրացրել է այն փաստը, որ շրջանառության հարկը պետք է կրկնապատկվի՝ 5-ից դառնալով 10 տոկոս, իսկ փաստաթղթեր ներկայացնողների համար, հակառակը, 1.5 տոկոսից իջնելու է 1 տոկոսի: Բացի այդ, դրվում է ապրանքը գույքագրելու պահանջ:

Հատկանշական է, որ բողոքող քաղաքացիները այս իշխանությունների և այս կառավարության աշխատաոճը համեմատում էին Հովիկ Աբրահամյանի կառավարության օրոք տնտեսվարողների համար ստեղծված բարենպաստ պայմանների հետ: Նրանք իրենց խոսքում նշում էին՝ մինչև չգա հետինը, չի հիշվի առաջինը,իսկ Աբրահամյանի կառավարության ժամանակաշրջանում անհատ ձեռներեցների և առևտրականների համար լավագույն պայմաններ էին:

Դժգոհող քաղաքացիներից մեկը ասաց. «Այն թվերին, երբ վարչապետը Հովիկ Աբրահամյանն էր, տնտեսվարողների համար մեծ դռներ էին բացված, մեծ հնարավորություններ ունեինք մեր ապրանքը իրացնելու և շահույթ ստանալու համար: Մարդը թույլ էր տալիս բոլոր ոլորտներում սեփական բիզնեսը ծաղկեցնել: Իսկ հիմա, այս իշխանությունները խլում են ՀՀ քաղաքացու բերանի վերջին պատառ հացը»:

Դժգոհող մարդկանց խոսքերով՝ իրենք մինչև վերջ պայքարելու են իրենց իրավունքների համար, պայքարելու են այս իշխանությունների դեմ: