Ի՞նչ են քննարկելու Շվեյցարիայում

Հայաստանի արտգործնախարար Արարատ Միրզոյանը փետրվարի 24-25-ն աշխատանքային այցով կգտնվի Շվեյցարիայում։ ԱԳՆ-ն հայտնում է, թե Արարատ Միրզոյանը Ժնևում կմասնակցի ՄԱԿ մարդու իրավունքների խորհրդի և Զինաթափման համաժողովի բարձրաստիճան հատվածներին և հանդես կգա ելույթներով: Նշվում է, թե ծրագրված են նաև երկկողմ հանդիպումներ, սակայն հայտնի չէ, թե ում հետ։

ՔՊ մեր աղբյուրների փոխանցմամբ, Միրզոյանն առաջին հերթին հույս ունի Ժնևում պայմանավորվածությունների հանգել՝ հայ-թուրքական կարգավորման հարցով բանակցություններն այդ երկրում կազմակերպելու համար։ Հիշենք, հենց Շվեյցարիայի Ցյուրիխ քաղաքում 2008 թ. տեղի ունեցան հայ-թուրքական բանակցությունները, կնքվեցին արձանագրությունները, որոնք այդպես էլ կյանքի չկոչվեցին։ Հայաստանի գործող իշխանությունները վերջին շրջանում ակտիվացրել են կարգավորման հարցով բանակցությունները, և գործընթացին խորհրդանշական տեսք հաղորդելու համար նպատակ ունեն Շվեյցարիայում կազմակերպել բանակցություններն էլ, նոր արձանագրությունների ստորագրումն էլ։

Առայժմ հայտնի չէ, թե ինչ դիրքորոշում ունի Անկարան։ Մի կողմից նրան ձեռք է տալիս բարելավել հարաբերությունները Հայաստանի հետ, ավելացնել իր ազդեցությունը Հարավային Կովկասի վրա։ Մյուս կողմից, Ադրբեջանի գործոնը զգալի խոչընդոտում է հայ-թուրքական հարաբերությունների կարգավորմանը։

Նիկոլ Փաշինյանի իշխանությունն աներեսի պես փորձում է տեղավորվել թուրքական ծիրում, ապահովել իր հետագա պաշտոնավարումը։ Միրզոյանն էլ այդ գործի առաջամարտիկն է դարձել։

Աննա Թամրազյան