769,500 դոլար. ԱՄՆ-ում տղամարդը կուլ է տվել Tiffany & Co. խանութից գողացված թանկարժեք զարդերը (լուսանկարներ)

ԱՄՆ-ում տղամարդը կուլ է տվել Tiffany & Co. ապրանքանիշի՝ մի քանի հարյուր հազար դոլար արժողությամբ գողացված զարդեր, հայտնում է cbsnews.com-ը՝ դատական փաստաթղթերին հղումով:

Տեխաս նահանգի Հյուսթոն քաղաքի 32-ամյա բնակիչ Ջեյթան Գիլդերը փետրվարի 26-ին թալանել է Tiffany & Co. ոսկերչական խանութն Օռլանդոյում: Գիլդերը, ըստ փաստաթղթերի, խանութ է մտել և աշխատակիցներին ասել է, որ իր անունը Շոն է, և նա ցանկանում է բանակցել Orlando Magic բասկետբոլային թիմի խաղացողի անունից՝ զարդերի գնման շուրջ: Նրան ուղեկցել են VIP սենյակ:

Գնումը ներառում էր երկու զույգ ադամանդե ականջօղեր և ադամանդե մատանի։ Զույգ ականջօղերը գնահատվում են 160,000 և 609,500 դոլար, իսկ մատանին՝ 587,000 դոլար, ոստիկանությանը հայտնել են խանութի աշխատակիցները:

Ինչ-որ պահի Գիլդերը տեղից վեր է թռել և խլել զարդերը: Այնուհետև նա փորձել է դուրս գալ VIP սենյակից՝ հրելով դռները: Խանութի աշխատակիցը փորձել է կանգնեցնել Գիլդերին, սակայն նա ուժեղ հրել է աշխատողին: Ծեծկռտուքի ժամանակ ադամանդե մատանին ընկել է։ Ոստիկանությունը հայտնել է, որ Գիլդերը կարողացել է իր մոտ պահել ականջօղերը և փախուստի դիմել մեքենայով:

Կարճ ժամանակ անց նրա մեքենան կանգնեցրել է ոստիկանը և բաժանմունք տեղափոխվելու ճանապարհին, տղամարդը կուլ է տվել զարդերը:

Այնուհետև Գիլդերին տեղափոխել են Վաշինգտոնի շրջանային բանտ, որտեղ շերտագրումը ցույց է տվել նրա ստամոքսում մի քանի օտար առարկաներ: Ոստիկանությունը կասկածում է, որ այդ իրերը գողացված ականջօղերն են: Դրանց ընդհանուր արժեքը $769,500 է:

Դատական ​​փաստաթղթերից պարզ չէ՝արդյոք ոստիկանությունը կարողացել է հետ ստանալ ականջօղերը: Գիլդերը ներկայումս գտնվում է Օրենջ շրջանի բանտում: