Փաշինյանը զգուշացրել է պատգամավորներին

Երեկ Ազգային ժողովում տեղի է ունեցել Նիկոլ Փաշինյանի հանդիպումը «Քաղաքացիական պայմանագիր» խմբակցության հետ: Հանդիպմանը ներկա են եղել նաև Կառավարության անդամներ և «Քաղաքացիական պայմանագիր» կուսակցության վարչության անդամներ: Ըստ կուսակցության պաշտոնական հաղորդագրության, հանդիպման ընթացքում տեղի է ունեցել քննարկում Ադրբեջանի հետ ընթացող խաղաղության գործընթացի շուրջ:

ՔՊ մեր աղբյուրների փոխանցմամբ, հապճեպ հանդիպման պատճառը Միջազգային իրավական ներկայացուցչի պաշտոնից Եղիշե Կիրակոսյանի հրաժարականն էր։ Թեև «Քաղպայմանագիրը» փորձում է համոզել, որ հրաժարականը տեղի է ունեցել անձնական հանգամանքներից ելնելով, Կիրակոսյանն էլ առանձնապես հակված չէ պարզաբանել իր որոշման իրական պատճառները, փորձագիտական շրջանակներից հնչող մեկնաբանությունները մտահոգել են Նիկոլ Փաշինյանին ու իր թիմին։ Խորհրդարանում կայացած հավաքում Փաշինյանը կուսակիցներին հանձնարարականներ է տվել, կրկին պնդել, որ կատարելու են Ադրբեջանի բոլոր պահանջները, հակառակ դեպքում սպառնացել նոր պատերազմով։

Վարչապետի պաշտոնը զբաղեցնող անձը նաև ակնարկել է, թե ուշադիր հետևում է բոլոր կուսակցականների վարքին, գործողություններին, և ստեղծված իրավիճակում իրենց պասիվ պահող, կուսակցական գծի համար կռիվ չանող պատգամավորները նոր ընտրական ցուցակներում չեն լինելու։ Փաշինյանը նշել է, թե այդ ֆորմատով հանդիպումները պարբերական են լինելու։

Էմմա Ամիրխանյան