Հարված արևմտամետներին. Փաշինյանը հավատարմության նոր երդումներ է տալիս Պուտինին

Հայրենի հաստիքային արևմտամետները ցնցակաթվածի մեջ են, «սիրելի» իշխանությունը, որ մեծ լոնքերով սլանում էր դեպի Եվրոպա, փոխում է արտաքին քաղաքական վեկտորը, կրկին սկսել է հավատարմության երդումներ տալ Ռուսաստանին։

Երեկ տեղի է ունեցել վարչապետ Նիկոլ Փաշինյանի հեռախոսազրույցը ՌԴ նախագահ Վլադիմիր Պուտինի հետ։ ՀՀ կառավարության փոխանցմամբ, վարչապետը ՌԴ նախագահին տեղեկացրել է «Հայաստանի և Ադրբեջանի միջև խաղաղության և միջպետական հարաբերությունների հաստատման մասին համաձայնագրի» նախագծի տեքստի համաձայնեցման և նախագծի տեքստի համաձայնեցման շուրջ բանակցությունների ավարտի մասին։ Քննարկվել են նաև տարածաշրջանային և երկկողմ հարաբերություններին վերաբերող այլ հարցեր։

Կրեմլի մամուլի ծառայությունն է հայտնել, թե հեռախոսազրույցը տեղի է ունեցել հայկական կողմի նախաձեռնությամբ։ Փաշինյանը հաստատել է, որ ընդունել է ՌԴ նախագահի հրավերը և մասնակցելու է մայիսի 9-ին Մոսկվայում կայանալիք հոբելյանական միջոցառումներին՝ նվիրված Հաղթանակի 80-ամյակին։ Հաղորդվում է, որ շոշափվել են ռուս-հայկական փոխշահավետ հարաբերությունների հետագա զարգացման որոշ հարցեր։

Մի շարք վերլուծաբաններ վերջին աշխարհաքաղաքական զարգացումների ֆոնին նշել էին, թե ՀՀ գործող իշխանություններին այլ ելք չի մնում, քան նորից ռուսահաճո քաղաքականություն վարել, փորձել բարելավել հարաբերությունները Մոսկվայի հետ, ինչն էլ այժմ տեսնում ենք։ 

Նարե Պետրոսյան