«Մեզանից գողացվեց մեր Արցախը, բայց մենք փյունիկի պես վեր կհառնենք»․ Բագրատ Սրբազան

«Մեզանից գողացվեց մեր Արցախը, գողացվեց մեր պատիվը, մեր կենսագրությունը, և, կարելի է ասել, մեր գոյության իմաստը։ Սակայն մենք փլատակների տակ ապրելու հոգեվիճակից փյունիկի պես նորից վեր կհառնենք, ես վստահ եմ, որովհետև մենք ոչ միայն խաչին, այլ նաև հարության հաղթանակին հավատացող ժողովուրդ ենք»,- այս մասին լրագրողների հետ զրույցում նշեց Սրբազան պայքարի առաջնորդ Բագրատ արքեպիսկոպոս Գալստանյանը, ով ևս ներկա էր Շուշիի ազատագրման օրվան նվիրված՝ «Շուշի. վերադարձ լինելու է» միջոցառմանը։

«Մենք, որպես ավագ սերունդ, իրավունք չունենք երիտասարդության ուսերին թողնելու հայրենիքի ազատագրության գործը, մենք պետք է նախապատրաստենք նրանց դրա համար, բայց պետք է միաժամանակ այդ բեռը վերցնենք մեզ վրա, դա պետք է լինի մեր առաքելությունը, իսկ երիտասարդները պետք է մեզ մղեն անընդհատ գործելու»,- նշեց Բագրատ Սրբազանը։