Փաշինյանը կրկին արշավել է Սյունիք

Մոսկվայում խայտառակ նվաստացումից հետո Նիկոլ Փաշինյանը վերադարձել է Երևան և տիկնոջ հետ անմիջապես մեկնել Սյունիք։ Փաշինյանը լինելու է Կապանում և Քաջարանում։ Ընդ որում, սա վերջին մեկ ամսում Փաշինյանի 2-րդ այցն է Սյունիք, առաջինն ապրիլի 12-ին է տեղի ունեցել դեպի Մեղրի։ Այնտեղ Փաշինյանը մասնակցել է «Կրթությունը նորաձև է» նախաձեռնության հավաքին, ելույթ ունեցել, այսօր և վաղն էլ Կապանում ու Քաջարանում է մասնակցելու նման միջոցառումներին, իսկ Խոզնավար կամ Խնածախ այցի մասին որևէ տեղեկություն չկա։

Ի դեպ, երեկ ուշ երեկոյան ադրբեջանական զինուժի ստորաբաժանումները կրակ են բացել Խնածախ բնակավայրի ուղղությամբ՝ վնասելով բնակելի տան տանիքը։ Վերջին շաբաթներին Ադրբեջանը պարբերաբար գնդակոծում է Խնածախը, Խոզնավարը, այլ բնակավայրեր, իսկ գործող իշխանությունները հնարավորինս զերծ են մնում արձագանքելուց։ Հաղորդագրություններ էլ ստիպված անում են, երբ արդեն այդ մասին տեղեկացրած են լինում ընդդիմադիր գործիչները։ Այժմ էլ Փաշինյանը, Կապան ու Քաջարան մեկնելով, փորձելու է տպավորություն ստեղծել, թե Սյունիքում ամեն ինչ բարվոք է, ավելին՝ մտածում են կրթվելու հեռանկարների մասին։ Դա ևս իրավիճակը լղոզելու և Ադրբեջանի պահանջները կատարելու փաշինյանական քաղաքականության մաս է կազմում։

Մարի Վարդանյան